Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 238 Hüküm no: 175 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın vefat eden Ahmed Efendi’nin terekesinden alacağı olduğu Husûs-ı âti’z-zikrin mahâllinde istimâ‘ ve tahrîri için bi’l-iltimâs savb-ı şer‘-i enverden mezûnen Mevlânâ Seyyid Mustafa Efendi irsâl olunup ol dahi mahmiye-i İstanbul’da Veled-i Karabaş mahâllesinde sâkin iken bundan akdem vefât eden Ahmed Efendi b. İsmail’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûre Çivizâde mahâllesinde sâkin bâ‘isü’l-kitâb Hasan Ağa b. Hüseyin meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Safiye Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Ahmed Efendi b. İsmail b. Abdullah zimmetinde cihet-i karz-ı şer‘îden bâ-temessük elli guruş ve yedinden müşterâ ve makbûz nâfe kürk bahasından dahi elli guruş ve bir rub‘ ki cem‘an elli altı guruş bir rub‘ guruş hakkım olup hattâ müteveffâ-yı mezbûr hâl-i kemâl-i sıhhatinde fevtinden on ay mukaddem meblağ-ı mecmû‘-ı mezbûr zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mârrü’z-zikr Çivizâde mahâllesinde sâkin el-Hâc Mehmed Ağa b. Ahmed ve Süleyman Çelebi b. Abdi li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Ahmed Efendi b. İsmail b. Abdullah hâl-i kemâl-i sıhhatinde fevtinden on ay mukaddem işbu müdde‘î-i mezbûr Hasan Ağa’nın yedinde olan deyn temessükü mûcebince cihet-i karz-ı şer‘îden elli guruş ve yedinden müşterâ ve makbûz bir nâfe kürk bahasından dahi altı guruş ve bir rub‘ guruş ki zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel el-Hâc İbrahim b. Hüseyin ve Salih Çelebi b. (°) ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 19 min-Cumâdelâhire sene 1143. Şuhûdü’l-hâl: el-Hâc Osman b. Abdülkerim, Abdurrahman Ağa b. Mehmed, Abdullah Çelebi b. el-Hâc Mehmed, Mehmed Çelebi b. Abdullah