Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 239 Hüküm no: 177 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi’nin oğlu Ali’nin üzerine annesi Ümmü Gülsüm’ün vasi tayin edildiği Mahmiye-i İstanbul’da Hadîce Sultân mahâllesinde sâkin iken bundan akdem vefât eden Kemânî Ömer Çelebi b. Mehmed’in sulbî sagīr oğlu Ali’nin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sagīr-i mezbûrun vâlidesi işbu râfi‘ü’l-kitâb Ümmü Gülsüm Hatun bt. el-Hâc Mehmed’i hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûr Ali’nin vakt-i rüşd ü sedâdına varınca tesviye-i umûruna vasî nasb u ta‘yîn buyurduklarında ol dahi vesâyet-i mezkûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 8 min-Cumâdelâhire sene 1143. Şuhûdü’l-hâl: Mustafa Ağa b. el-Hâc Mehmed, Ebubekir Efendi b. İbrahim, Ahmed Ağa b. el-Hâc Mehmed, el-Hâc İsmail b. el-Hâc Mehmed, İbrahim Beşe b. Veli, Ahmed Beşe b. Mehmed