Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 239 Hüküm no: 178 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ömer’in vefat eden Kemani Ömer Çelebi’den alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Ahmed Efendi b. Osman irsâl olunup ol dahi mahmiye-i İstanbul’da Hadîce Sultân mahâllesinde sâkin iken bundan akdem vefât eden Kemânî Ömer Çelebi b. Mehmed’in mahâlle-i mezbûrede vâki‘ menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde kemânî tâifesinden bâ‘isü’l-kitâb el-Hâc Mustafa b. Ömer meclis-i ma‘kūd-ı mezkûrda müteveffâ-yı mezbûrun sulbî sagīr oğlu Ali’nin vâlidesi ve tesviye-i umûruna kıbel-i şer‘den mansûbe vasiyyesi olmağla terekesine bi’l-vesâye vâzı‘atü’l-yed olan Ümmü Gülsüm Hatun bt. el-Hâc Mehmed b. Abdullah tarafından husûs-ı âti’l-beyanda müseccel vekîli ve li-ebeveyn er karındaşı Mustafa Ağa mahzarında üzerine da‘vâ ve takrîr-i kelâm edip müteveffâ-yı mezbûr Kemânî Ömer Çelebi b. Mehmed b. Abdullah zimmetinde işbu bin yüz kırk senesi Muharremü’l-haramı gurresi târîhiyle müverrah mümzâ ve mahtûm temessük mantûkunca cihet-i karz-ı şer‘îden seksen yedi guruş hakkım olup hattâ müteveffâ-yı mezbûr hayâtında meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûrumuzda ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Alipaşa mahâllesinde sâkin Ali Ağa b. Abdullah ve Ali Çelebi b. Mahmud li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Kemânî Ömer Çelebi b. Mehmed b. Abdullah hayâtında işbu bin yüz kırk senesi Muharremü’l-haramı gurresi târîhiyle müverrah mümzâ ve mahtûm temessük mantûkunca işbu müdde‘î mezbûra cihet-i karz-ı şer‘îden seksen yedi guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel İbrahim Çelebi b. Abdullah ve Mustafa Çelebi b. el-Hâc Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 8 Cumâdelâhire sene 1143. Şuhûdü’l-hâl: Es-seyyid Abdullah Ağa b. es-Seyyid Mustafa, Halil Ağa b. Abdurrahman, İbrahim Çelebi b. Mehmed, Mehmed Çelebi b. Ahmed, el-Hâc İsmail b. Mehmed, Ahmed Çelebi b. Mehmed