Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 240 Hüküm no: 179 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin terekesi Mahrûse-i Galata muzâfâtından kasaba-i Kasım Paşa’da Câmi‘-i kebîr mahâllesi ahâlîsinden olup vilâyet-i Anadolu’da Nallıhan kasabasında misâfiren sâkin iken bundan akdem vefât eden Mehmed Çelebi b. İsmail’in verâseti zevce-i menkûha-i metrûkesi Fâtıma Hatun bt. el-Hâc Mustafa ile sulbî sagīr oğlu İsmail’e münhasıra olduğu şer‘an zâhir ve mukarrer oldukdan [sonra] sagīr-i mezbûrun vâlidesi ve tesviye-i umûruna kıbel-i şer‘den vasî nasb u ta‘yîn olunan mezbûre Fâtıma Hatun talebiyle müteveffâ-yı mezbûrun mâlından hîn-i fevtinde yanında mevcûd olup hâlâ mahmiye-i İstanbul’da Cezerî Kasım Paşa mahâllesinde sâkin umdetü’l-a‘yân es-Seyyid Ahmed Bey b. el-merhûm es-Seyyid Mustafa Bey’in yedinde emânet olan terekesi ve sâir eşyâsı tahrîr ve defter olunup beyne’l-verese taksîm olunduğu ber-vech-i âtî zikr olunur. Fi’l-yevmi’s-sâmin aşer min-Cumâdelûlâ sene 1143. Köhne çuka dolama 480 akçe Çuka cübbe 400 akçe Köhne çuka biniş 500 akçe Kapsız köhne cilkafa kürk 600 akçe Köhne yemenî kürk 360 akçe Köhne sarık 3 450 akçe Don 2, gömlek 2 300 akçe Beyaz sâde 120 akçe Çarşeb 80 akçe Köhne peşkir 60 akçe Âbdest makraması 3, uçkur 3, dülbend örtüsü 200 akçe Köhne kavuk 1 40 akçe Köhne yemenî yorgan 120 akçe Baş yasdık 40 akçe Kaba bez 7 top, fî 82 300 akçe [40a] Köhne boğça 30 akçe Sahan 2, ibrik 180 akçe Pirinç devât 60 akçe Kara bıçak 70 akçe Yekûn-ı eşyâ: 5.400 akçe Müteveffâ-yı mezbûrun menzilinde mevcûde bulunan eşyâsıdır ki ale’l-esâmi ber-vech-i âtî zikr olunur. Minder 3 600 akçe Köhne beledî döşek 240 akçe Beledî yasdık 5 400 akçe Yemenî yorgan 2 500 akçe Sofra 1 80 akçe Tâbe 1 50 akçe Sahan 2 90 akçe Sagīr tas 45 akçe Tencere 400 akçe ...? 2 320 akçe Tencere kapağı 70 akçe Havan 150 akçe Kantar 55 akçe Yekûn: 3.000 akçe Cem‘an yekûn: 8.400 akçe Minhe’l-ihrâcât Mehr-i müeccel-i müsbete li-zevceti’l-mezbûre şehâdet-i Molla Mehmed ve el-Hâc Ahmed ba‘de’l-half ve’l-yemîn 5.000 akçe Deyn-i müsbet ekmekçi ve kasab ve bakkāl 1.200 akçe Yekûn: 6.200 akçe Sahhü’l-bâkī: 2.200 akçe Hissetü’z-zevceti’l-mezbûre Fâtıma Hatun 275 akçe Hissetü’l-ibni’l-mezbûr sagīr İsmail 1.925 akçe Müteveffâ-yı mezbûrun zikr olunan Kasım Paşa’da Câmi‘-i kebîr mahâllesinde vâki‘ mülk menzilinin sülüs hissesi olup menzil-i mezbûrda olan hissesi dahi bey‘ olundukda verese beynlerinde taksîm olunmak üzere bu mahâlle şerh verildi. Vasiyye-i mezbûre Fâtıma Hatun talebiyle sagīr-i mezbûr İsmail’e kıbel-i şer‘den târîh-i kitâbdan mâl-ı müntakilinden olmak üzere beher yevm ikişer para nafaka ve kisve-baha farz ve takdîr olunup meblağ-ı mefrûz-ı mezbûr beher yevm ikişer parayı sagīr-i mezbûrun nafaka ve kisve-baha ve sâir levâzım-ı zarûriyesine harc u sarfa ve hîn-i hâcetde istidâneye ve lede’z-zafer mâlına rücû‘a vasiyye-i mezbûre Fâtıma Hatun’a izin verildiği bu mahâlle şerh olundu. Şuhûdü’l-hâl: Es-seyyid Ahmed Bey b. Mustafa Bey, Hüseyin Ağa b. İbrahim, Molla Mehmed b. Osman, Ahmed Efendi Bursavî