Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 242 Hüküm no: 180 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mustafa’nın Edirne’deki eve ait kendi hissesini Rabia Hanım’a sattığı Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Şeyhzâde Abdülkerim Efendi irsâl olunup ol dahi mahmiye-i İstanbul’da Cezerî Kasım Paşa mahâllesinde vekîlharç kerîmesi Fâtıma Hatun’un menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Kuyumcu Bahşayiş mahâllesinde sâkine iken bundan akdem vefât eden Afife Hatun bt. Ferhad Ağa’nın verâseti zevc-i metrûkü el-Hâc İbrahim b. Mustafa ile mukarrun-leh bi’n-neseb cihetinden Rabia Hanım bt. Sinan Paşa’ya münhasıra ve tashîh-i meselesi iki sehmden olup sihâm-ı mezbûrenin bir sehmi zevci mezbûr el-Hâc İbrahim’e ve bâkī bir sehmi dahi mezbûre Rabia Hanım’a isâbeti tahakkukundan sonra mezbûr el-Hâc İbrahim meclis-i ma‘kūd-ı mezbûrda işbu bâ‘isetü’l-kitâb mezbûre Rabia Hanım bt. Sinan Paşa b. Abdurrahman tarafından bey‘-i âti’z-zikri tasdîke vekîl-i müsecceli olan dâmâdı Mehmed Ağa b. Habib mahzarında ikrâr-ı tâm ve takrîr-i kelâm edip arsasının senede Sinan Paşa Vakfı’na elli akçe mukāta‘a-i kadîmesi ve binâsı zevcem müteveffât-ı mezbûrenin ile’l-vefât yedinde mülk ve hakkı olup ba‘de-vefâtihî bize intikāl eden mahrûse-i Edirne’de Devletşah mahâllesinde vâki‘ bir tarafdan Debbâğ Halil nâm kimesne menzili ve bir tarafdan ba‘zan Yusuf Beşe ve ba‘zan Kazzâz kızı menzilleri ve bir tarafdan hamam külhanı ve bir tarafdan tarîk-i âm ile mahdûd fevkānî bir bâb oda ve tahtânî üç bâb oda ve bir bi’r-i mâ ve iki kenîf ve bir mikdâr havluyu müştemil mülk menzilden tashîh-i mezbûr üzere bana isâbet eden bir sehm-i şâyi‘i bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile müvekkile-i mezbûre Rabia Hanım’a elli guruşa bey‘ ve temlîk ol dahi ber-vech-i muharrer iştirâ ve temellük ve kabûl edip semeni olan meblağ-ı mezbûr elli guruşu yedinden tamâmen alıp kabz edip müvekkile-i mezbûre Rabia Hanım’ı mahâllinde kabza taslît eyledim ba‘de’l-yevm menzil-i mahdûd-ı mezbûrun bir sehmi ırsen ve bir sehmi şirâen mezbûre Rabia Hanım’ın mülk-i mahzı ve hakk-ı sırfı olmuşdur, benim kat‘â alâka ve medhalim yokdur [40b] keyfe mâ teşâ’ ve tehtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa Çelebi b. el-Hâc Hasan ve İsmail b. Mustafa ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 14 Cumâdelâhire sene 1143.