Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 243 Hüküm no: 181 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hanım’ın vefat eden Afife Hatun’un terekesinden hakkını aldığı Kezâlik akd-i meclis ettikde mahmiye-i mezbûrede Kuyumcu Bahşayiş mahâllesinde sâkine iken bundan akdem vefât eden Afife Hatun bt. Ferhad Ağa’nın verâseti zevc-i metrûkü el-Hâc İbrahim b. Mustafa ile mukarrun-leh bi’n-neseb cihetinden Rabia Hanım bt. Sinan Paşa’ya münhasıra ve tashîh-i meselesi iki sehmden olup sihâm-ı mezbûrenin bir sehmi zevc-i mezbûr el-Hâc İbrahim’e ve bâkī bir sehmi dahi mezbûre Rabia Hanım’a isâbeti tahakkukundan sonra mezbûre Rabia Hanım bt. Sinan Paşa b. Abdurrahman tarafından husûs-ı âti’l-beyanda vekîl olduğu zât-ı mezbûreyi ma‘rifet-i şer‘iyye ile ârifân es-Seyyid el-Hâc Mehmed Ağa b. es-Seyyid Abdülfettah ve el-Hâc Mehmed Ağa b. el-Hâc Hasan Ağa şehâdetleriyle şer‘an sâbit olan dâmâdları Mehmed Ağa b. Habib meclis-i mezbûrda tereke-i müteveffât-ı mezbûreye bi’l-verâse vâzı‘ü’l-yed olan zevci işbu bâ‘isü’l-kitâb mezbûr el-Hâc İbrahim mahzarında bi’l-vekâle ikrâr-ı tâm ve takrîr-i kelâm edip müteveffât-ı mezbûre Afife Hatun’un terekesi tahrîr ve ba‘de-ihrâci’l-masârıf ve’s-sülüs ber-mûceb-i defter-i kassâm-ı askerî tashîh-i mezbûr üzere müvekkilem mezbûre Rabia Hanım’ın hissesine isâbet eden kırk bin üç yüz altmış sekiz akçeyi tereke-i müteveffât-ı mezbûreden olmak üzere mezbûr el-Hâc İbrahim işbu meclis-i ma‘kūdda bana tamâmen def‘ u teslîm ben dahi vech-i muharrer üzere yedinden bi’t-tamâm ve’l-kemâl alıp kabz eyledim ba‘de’l-yevm meblağ-ı mezbûrdan yedinde bir akçe ve bir habbe bâkī kalmayıp müteveffât-ı mezbûrenin terekesinde dâhil-i defter ve hâric ez-defter hukūk-ı ma‘lûme ve mechûle mîrâsa müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûr el-Hâc İbrahim’in zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa Çelebi b. el-Hâc Hasan ve İsmail b. Mustafa ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 14 Cumâdelâhire sene 1143. Şuhûdü’l-hâl: Ahmed Ağa b. Ali, Şâtır Ahmed Ağa b. Mustafa, İbrahim Çelebi b. Ahmed, el-Hâc Yusuf b. Abdullah, İbrahim b. Ali, Ahmed b. el-Hâc Mehmed