Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 244 Hüküm no: 182 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukıye Hatun’un vefat eden kocası Çukadar Mustafa’nın terekesinden hakkını aldığı Mahmiye-i İstanbul’da Sarı Nasuh mahâllesinde sâkin iken bundan akdem vefât eden Çukadâr Mustafa b. Abdullah’ın verâseti zevce-i menkûha-i metrûkesi Şerîfe Rukıye Hatun bt. es-Seyyid Mustafa ile usûbet-i nesebiye cihetinden vârisi olup kendüyü i‘tâk eden müteveffâ Mustafa Ağa b. Mehmed’in li-ebeveyn er karındaşı Numan Çelebi’ye münhasıra ve tashîh-i meselesi dört sehmden olmağla sihâm-ı mezbûreden bir sehmi zevcesi mezbûre Şerîfe Rukıye Hatun’a ve bâkī üç sehmi mezbûr Numan Çelebi’ye isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Şerîfe Rukıye Hatun meclis-i şer‘-i şerîf-i enverde müteveffâ-yı mezbûrun usûbet-i nesebiye cihetinden vârisi olmağla terekesine bi’l-verâse vaz‘-ı yed eden bâ‘isü’l-kitâb mezbûr Numan Çelebi mahzarında ikrâr ve takrîr-i kelâm edip zevcim müteveffâ-yı mezbûrun terekesi tahrîr ve ba‘de-ihrâci’l-masârıf ve’d-düyûn ve’s-sülüs ber-mûceb-i defter-i kassâm-ı askerî tashîh-i mezbûr üzere hisseme isâbet eden dokuz bin yetmiş bir akçe ile zevcim müteveffâ-yı mezbûr zimmetinde mütekarrer ve ma‘kūdün-aleyh mehr-i müeccelim bin iki yüz akçe ki cem‘an on bin iki yüz yetmiş akçeyi mezbûr Numan Çelebi bana def‘ u teslîm ben dahi tereke-i müteveffâ-yı mezbûrdan olmak üzere bi’t-tamâm ve’l-kemâl yedinden alıp kabz eyledim min-ba‘d meblağ-ı mecmû‘-ı mezbûr on bin iki yüz yetmiş bir akçeden mezbûr Numan Çelebi yedinde ve zimmetinde bir akçe ve bir habbe bâkī kalmayıp ba‘de’l-yevm tereke-i müteveffâ-yı mezbûra müte‘allıka âmme-i de‘âvî ve mutâlebât ve eymân ve muhâsamâtdan mezbûr Numan Çelebi ile müteveffâ-yı mezbûrun vesâyâsını tenfîze bâ-hüccet-i şer‘iyye vasiyy-i muhtârı işbu Osman Ağa ve oğlu Ahmed Ağa’nın zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eylediğimde mezbûr Numan Çelebi dahi benim ve li-ebeveyn kız karındaşım Şerîfe Âişe Hatun ve vâlidem Şerîfe Fâtıma’nın zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelâhire sene 1143. Şuhûdü’l-hâl: Hasan Efendi b. Süleyman, Ahmed Efendi b. Osman, el-Hâc Mehmed Efendi b. el-Hâc Mustafa, el-Hâc İbrahim b. Hüseyin, Salih Çelebi b. Halil, Ahmed Çelebi b. Hasan