Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 245 Hüküm no: 183 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın vefat eden Başmakçızade Mustafa Efendi’de alacağı olduğu Husûs-ı âti’l-beyanın mahâllinde istimâ‘ ve tahrîri iltimâs olunmağın savb-ı şer‘-i enverden Mevlânâ Hasan Efendizâde el-Hâc Abdullah Efendi irsâl ol dahi mahmiye-i İstanbul’da Pirinçci Sinan mahâllesinde sâkin es-Seyyid Hasan Ağa b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûre Emin Nureddin mahâllesinde sâkin işbu bâ‘isü’l-kitâb Bezzâzistânî Küçük el-Hâc Hüseyin Ağa b. Osman meclis-i ma‘kūd-ı mezkûrda mahmiye-i mezbûrede Haraççı Muhyiddin mahâllesi ahâlîsinden olup vilâyet-i Rumeli’nde medîne-i Yenişehir kādısı bundan akdem medîne-i mezbûrede intikāl-i dâr-ı bekā eden merhûm Başmakçızâde es-Seyyid Mustafa Efendi b. el-merhûm el-mebrûr Şeyhülislâm es-Seyyid Ali Efendi’nin tesviye-i umûruna cânib-i şer‘-i mutahhardan bâ-hüccet vasiyy-i mansûbu olmağla terekesine bi’l-vesâye vaz‘-ı yed eden mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mûmâ-ileyh Başmakçızâde [41a] es-Seyyid Mustafa Efendi necli’l-merhûm el-mebrûr es-Seyyid Ali Efendi zimmetinde yedimde olan bin yüz kırk iki senesi Zilka‘desi târîhiyle müverrah ve imzâ ve hatemiyle mümzâ ve mahtûm deyn temessükü mûcebince eşyâ-i ma‘lûme semenlerinden altı yüz kırk sekiz guruş hakkım olup hattâ merhûm-ı mûmâ-ileyh hayâtında meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu târîh-i mezbûrda huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim suâl olunsun dedikde gıbbe’s-suâl vasiyy-i mezbûr cevâbında tereke-i merhûm-ı mûmâ-ileyhe ber-vech-i muharrer vaz‘-ı yedini ikrâr ve müdde‘î-i mezbûrun ber-vech-i mübeyyen müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mûmâ-ileyhin hayâtında kethüdâsı Abdurrahman Efendi b. Abdurrahman ve mahmiye-i mezbûrede Hoca Paşa mahâllesinde sâkin Kafesdâr el-Hâc İsmail b. el-Hâc Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mûmâ-ileyh Başmakçızâde es-Seyyid Mustafa Efendi necli’l-merhûm el-mebrûr es-Seyyid Ali Efendi hayâtında işbu müdde‘î-i mezbûr el-Hâc Hüseyin Ağa yedinde olan bin yüz kırk iki senesi Zilka‘desi târîhiyle müverrah ve imzâ ve hatemiyle mümzâ ve mahtûm deyn temessükü mûcebince eşyâ-i ma‘lûme semenlerinden altı yüz kırk sekiz guruş vâcibü’l-edâ deyni olduğunu târîh-i mezbûrda huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan İbrahim b. Halil ve Osman b. Mustafa ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 10 min-Cumâdelâhire sene 1143. Şuhûdü’l-hâl: Es-seyyid Ahmed Efendi b. es-Seyyid Hasan, Hasan Beşe b. Mustafa, Hüseyin b. Mehmed, Osman b. Mustafa