Bab Mahkemesi 54 Numaralı Sicil (H. 1102 / M. 1691) cilt: 20, sayfa: 90 Hüküm no: 59 Orijinal metin no: [9a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıkçı ve peremecilerin Ahmed Beşe b. Mehmed’in kethüdalığından memnun oldukları Dârü’l-hilâfeti’l-aliyye Kostantıniyye el-mahmiye ve etrâfında olan Kayıkçı ve Peremeci tâifesinden Beşiktaşlı Mustafa Beşe b. Mehmed ve Mustafa b. İbrahim ve Tophâne’den İbrahim b. Musli ve Mehmed b. Hüseyin ve Galata’dan Hüseyin b. Yusuf ve Ahmed b. Mehmed ve Kasımpaşa’dan Ali b. Mehmed ve Mehmed b. Hüseyin? Hasköy’den Mustafa Beşe b. Ali ve Mehmed b. Osman ve medîne-i hazret-i Ebâ Eyyûb Ensârî -rıdvânullâhi aleyhi’l-bârîden- Mustafa b. Veli ve Hızır b. Yusuf ve Ahmed b. Hasan ve es-Seyyid Ahmed b. Mehmed ve Balat iskelesinden Ahmed b. Mehmed ve Ahmed b. Abdullah ve es-Seyyid Ahmed Çelebi b. Mehmed ve Abdurrahman b. Hüseyin ve Fener iskelesinden Yusuf Beşe b. Abdullah ve Hüseyin b. Mehmed ve Habib Ali’den Ahmed Beşe b. Musli ve el-Hâc Şaban b. Eyyûb ve Unkapanı’ndan Yusuf Beşe b. Ali ve Hasan Beşe b. Ahmed ve Ali b. Mehmed ve Ahırkapı’dan Ramazan b. Abdullah ve Mehmed b. Ali ve es-Seyyid Hasan Çelebi b. Hüseyin ve Kumkapı’dan işbu Halil Çelebi b. Mehmed ve Ali b. Hüseyin ve Samatya’dan Mustafa b. Süleyman ve Mehmed b. İbrahim ve sâir ma‘lûmü’l-esâmi ve’l-eşhâs cemm-i gafîr meclis-i şer‘-i şerîf-i enver ve mahfil-i dîn-i münîf-i ezherde, hâlâ kethüdâları olan bâ‘isü hâze’l-kitâb Ahmed Beşe b. Mehmed mahzarında her biri takrîr-i kelâm ve tavzîh-i merâm edip, mezbûr Ahmed Beşe bin doksan altı senesi şehr-i Recebü’l-ferdi’nde mutasarrıf olduğu yevmî on beş akçe yeniçerilik ulûfesi bedeli kayıkçılar [9b] ve peremeciler kethüdâlığı taraf-ı Devlet-i aliyye’den kendiye tevcîh ve yedine berât-ı âlîşân ihsân olmağla, ol tarihden beru üzerimzide kethüdâ olmağla mezbûrun evzağ ve etvarından ahsen-i sülûk ve ef‘âlinden her birimiz bi’l-cümle kayıkçı ve peremeci tâifeleri râzı ve hoşnûd olup ve kadîmü’l-eyyâmdan kethüdâmız olanlar kürekçi ve sâir rüsûm-ı mîrî tahsîline usret olmamak için yine bizim ihtiyârımızla her bir iskeleye bir vekîl ta‘yîn edegelmekle mezbûr dahi ma‘rifetimizle nasb edip ve’l-hâsıl hidemât-ı lâzımede mücidd ü sâ‘îdir deyu mezbûr Ahmed Beşe’nin hüsn-i hâlini her biri i‘lâm ve inhâ etmeğin, mezbûrûnun ber-minvâl-i muharrer ihbârları mezbûr Ahmed Beşe talebiyle ketb ve imlâ ve yedlerine def‘ u i‘tâ olundu. Fi’l-yevmi’r-râbi‘ ve’l-ışrîn min Cemâziyelevvel sene 1102. Şuhûdü’l-hâl: Mehmed Efendi b. Mustafa, es-Seyyid Abdülmu‘tî Efendi, İbrahim, diğer İbrahim Çelebi [b.] Ahmed, Mustafa b. Şaban.