Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 247 Hüküm no: 185 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef v. Mosi’nin vefat eden Başmakçızade Mustafa Efendi’de alacağı olduğu Kezâlik akd-i meclis-i şer‘-i şerîf ettikde Çukacı tâifesinden işbu hâmilü’s-sifr Yasef v. Mosi nâm Yahûdî meclis-i ma‘kūd-ı mezkûrda mahmiye-i mezbûrede Haraççı Muhyiddin mahâllesi ahâlîsinden olup vilâyet-i Rumeli’nde medîne-i Yenişehir kādısı iken bundan akdem intikāl-i dâr-ı bekā eden merhûm Başmakçızâde es-Seyyid Mustafa Efendi necli’l-merhûm el-mebrûr Şeyhülislâm es-Seyyid Ali Efendi’nin tesviye-i umûruna cânib-i şer‘-i kavîmden bâ-hüccet vasiyy-i mansûbu olmağla terekesine bi’l-vesâye vaz‘-ı yed eden mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mûmâ-ileyh Başmakçızâde es-Seyyid Mustafa Efendi necli’l-merhûm el-mebrûr es-Seyyid Ali Efendi zimmetinde ber-mûceb-i temessük yedimden müşterâ ve makbûz çuka semeninden ba‘de-külli’l-hesâb iki yüz seksen altı guruş ve hâric ez-temessük yüz otuz guruş ki cem‘an dört yüz on altı guruş hakkım olup hattâ merhûm-ı mûmâ-ileyh hayâtında vech-i meşrûh üzere meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim, vasiyy-i mezbûra suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mûmâ-ileyhin hayâtında kethüdâsı Abdurrahman Efendi b. Abdurrahman ve Hüseyin Çelebi b. İsmail li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka [41b] merhûm-ı mûmâ-ileyh Başmakçızâde es-Seyyid Mustafa Efendi necli’l-merhûm el-mebrûr es-Seyyid Ali Efendi hayâtında işbu müdde‘î-i mesfûr Çukacı Yasef v. Mosi nâm Yahûdîye ber-mûceb-i temessük yedinden müşterâ ve makbûz çuka semeninden ba‘de-külli’l-hesâb iki yüz seksen altı guruş ve hâric ez-temessük yüz otuz guruş ki cem‘an dört yüz on altı guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm vâki‘ hâli ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn