Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 247 Hüküm no: 186 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap, hayyât, bakkal ve sair esnafın Başmakçızade Mustafa Efendi’nin terekesinden alacakları olduğu Kezâlik akd-i meclis-i şer‘-i şerîf ettikde mahmiye-i mezbûrede Süleymaniye kurbünde Mollagürânî mahâllesinde sâkin bâ‘isü’l-kitâb Süleyman Hoca b. Mehmed meclis-i ma‘kūd-ı mezkûrda mahmiye-i mezbûrede Haraççı Muhyiddin mahâllesi ahâlîsinden olup vilâyet-i Rumeli’nde medîne-i Yenişehir kādısı iken bundan akdem medîne-i mezbûrede intikāl-i dâr-ı bekā eden merhûm Başmakçızâde es-Seyyid Mustafa Efendi necli’l-merhûm el-mebrûr Şeyhülislâm es-Seyyid Ali Efendi’nin tesviye-i umûruna cânib-i şer‘-i mutahhardan bâ-hüccet vasiyy-i mensûbu olmağla terekesine bi’l-vesâye vaz‘-ı yed eden mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi zimmetinde vezn ve kıymeti beynimizde ma‘lûm yedinden müşterâ ve makbûz ma‘cûn ve hab semeninden ba‘de-külli’l-hesâb on beş buçuk guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim suâl olunsun dedikde gıbbe’s-suâl ve’l-inkâr haffâf tâifesinden Hüseyin Çelebi b. Mehmed meclis-i ma‘kūd-ı mezkûrda vasiyy-i mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi zimmetinde yedinden müşterâ ve makbûz haffâf metâ‘ı semeninden ba‘de-külli’l-hesâb yirmi beş guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim suâl olunsun dedikde gıbbe’s-suâl ve’l-inkâr bakkāl tâifesinden Toros v. Dimitri nâm zimmî meclis-i ma‘kūd-ı mezkûrda vasiyy-i mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi zimmetinde ecnâsı beynimizde ma‘lûm yedimden müşterâ ve makbûz bakkāl metâ‘ı semeninden ber-mûceb-i temessük yetmiş iki buçuk guruş ve hâric ez-temessük otuz üç guruş ki cem‘an yüz yetmiş buçuk guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mecmû‘-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim suâl olunsun dedikde gıbbe’s-suâl ve’l-inkâr hayyât tâifesinden Toros v. Agob nâm zimmî meclis-i ma‘kūd-ı mezkûrda vasiyy-i mezbûr es-Seyyid Hasan Ağa mahzarında üzerine da‘vâ ve takrîr-i kelâm ve merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi zimmetinde ücret-i hayyâtından bâkī kırk guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i mezbûrdan zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim suâl olunsun dedikde gıbbe’s-suâl ve’l-inkâr yine hayyât tâifesinden Karakaş v. Avanis nâm zimmî meclis-i ma‘kūd-ı mezkûrda vasiyy-i mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi zimmetinde ücret-i hayyâtından bâkī yirmi sekiz guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim suâl olunsun dedikde gıbbe’s-suâl ve’l-inkâr kasab tâifesinden Yani v. Kefo nâm zimmî meclis-i ma‘kūd-ı mezkûrda vasiyy-i mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi zimmetinde vezn ve kıymeti beynimizde ma‘lûm yedimden müşterâ ve makbûz lahm-ı ganem bahasından ba‘de-külli’l-hesâb on üç guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr Vezirhanı tüccârından Ogez v. Somor nâm zimmî meclis-i ma‘kūd-ı mezkûrda vasiyy-i mezbûr es-Seyyid Hasan Ağa mahzarında üzerine da‘vâ ve takrîr-i kelâm edip merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi zimmetinde ecnâsı beynimizde ma‘lûm yedimden müşterâ ve makbûz emti‘â-i mütenevvi‘a semeninden ba‘de-külli’l-hesâb otuz dört guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim suâl olunsun [dedikde] [42a] gıbbe’s-suâl ve’l-inkâr müdde‘iyûndan müdde‘âlarına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından hayâtında kethüdâsı Abdurrahman Efendi b. Abdurrahman ve Hüseyin Çelebi b. İsmail li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr es-Seyyid Mustafa Efendi ibni’l-merhûm el-mebrûr Şeyhülislâm es-Seyyid Ali Efendi hâl-i kemâl-i sıhhatinde işbu müdde‘î-i mezbûr Hoca Süleyman’a vezn ve kıymeti beynlerinde ma‘lûm yedinden müşterâ ve makbûz ma‘cûn ve hab semeninden ba‘de-külli’l-hesâb on beş buçuk guruş ve mezbûr haffâf Hüseyin Çelebi’ye yedinden müşterâ ve makbûz haffâf metâ‘ı semeninden ba‘de-külli’l-hesâb yirmi beş guruş ve mersûm Bakkāl Toros zimmîye ecnâsı beynlerinde ma‘lûm yedinden müşterâ ve makbûz bakkāl metâ‘ı semeninden ber-mûceb-i temessük yetmiş iki buçuk guruş ve hâric ez-temessük otuz üç guruş ve merkūm Hayyât Toros zimmîye [ü]cret-i hayyâtından bâkī kırk guruş ve Hayyât Karakaş zimmîye kezâlik ücret-i hayyâtından bâkī yir[mi] sekiz guruş ve mezbûr Kasab Yani zimmîye vezn ve kıymeti beynlerinde ma‘lûm yedinden müşterâ ve makbûz lahm-ı ganem bahasından ba‘de-külli’l-hesâb on üç guruş ve mesfûr Ogez zimmîye ecnâsı beynlerinde ma‘lûm yedinden müşterâ ve makbûz emti‘â-i mütenevvi‘a semeninden ba‘de-külli’l-hesâb otuz dört guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın zikr olunan müdde‘îlerden her biri alâ-vech-i şer‘î ba‘de’t-tahlîf mûcebiyle ba‘de’l-hükm ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn