Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 251 Hüküm no: 188 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Patrona Halil’in gasbettiği kölenin sahibine iadesi Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden Mevlânâ Mehmed Efendi irsâl olunup ol dahi mahmiye-i İstanbul’da Süleymaniye Câmi‘i kurbünde Ağakapısı’nda vâki‘ yeniçeri beytülmalı emîni olanlara mahsûs odaya varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahrûse-i Üsküdar mahâllâtından Doğancılar mahâllesi ahâlîsinden işbu bâ‘isü’l-kitâb Hancı Mustafa Beşe b. Abdullah meclis-i ma‘kūd-ı mezkûrda Dergâh-ı âlî yeniçerilerinin on yedi bölük odası neferâtından olup oda-i mezbûrede sâkin iken bundan akdem vefât eden Patrona Halil Beşe b. Abdullah’ın zâhirde vâris-i ma‘rûfu olmayıp terekesi cânib-i beytülmala âid olmağın tâife-i mezbûrenin beytülmallarını kabza memûr olmağla terekesine bi’l-emâne vâzı‘ü’l-yed, husûmet ve redd-i cevâba kıbel-i şer‘den mezûn olan bi’l-fi‘il beytülmal emîni fahrü’l-akrân Ahmed Ağa b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Patrona Halil Beşe b. Abdullah b. Abdullah târîh-i fevtinden kırk gün mukaddem bana rıkkını mu‘terif işbu açık başlı, elâ gözlü, orta boylu, Acemiyyü’l-asl, Müslimetü’l-millet Selim nâm gulâmı mülkümde olduğu hâlde huzûr-ı Müslimînde yedimden [42b] gasb edip mevsûf-ı mezbûru kable’l-ahz fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl emîn-i mezbûr cevâbında gulâm-ı merkūma terekeden olmak üzere bi’l-emâne vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı Müslimînden olup zikr olunan Doğancılar mahâllesi ahâlîsinden Ahmed Çelebi b. Ali ve Halil Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Patrona Halil Beşe b. Abdullah b. Abdullah târîh-i fevtinden kırk gün mukaddem müdde‘î-i mezbûra rıkkını mu‘terif işbu açık başlı elâ-gözlü orta boylu Acemiyyü’l-asl Müslimetü’l-millet Selim nâm gulâm müdde‘î-i mezbûrun mülkünde olduğu hâlde huzûrumuzda yedinden gasb eyledi, biz bu husûsu bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Ahmed b. Hasan ve Mehmed b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 11 min-Cumâdelâhire sene 1143. Şuhûdü’l-hâl: Mehmed Efendi b. Ali, Hasan Ağa b. Receb, Hüseyin Ağa b. Mehmed, İsmail Efendi b. (°)