Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 253 Hüküm no: 190 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdadi Şemseddin Efendi’nin vefatından önce emaneten bıraktığı sandığın teslim edildiği Husûs-ı âti’l-beyanın mahâllinde ketb ü tahrîri için bi’l-iltimâs savb-ı şer‘-i enverden Mevlânâ es-Seyyid Mahmud Efendi irsâl olunup ol dahi mahmiye-i İstanbul’da Vâlidehanı tüccârından el-Hâc Ahmed b. Mehmed’in odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Fenâî kurbünde Toptaşı mahâllesinde sâkin iken katlen vefât eden Bağdâdî Şemseddin Efendi b. Abdullah’ın sulbî sagīr oğlu Ahmed’in tesviye-i umûruna kıbel-i şer‘den mansûb vasîsi olmağla terekesine bi’l-vesâye v[âzı‘u]’l-yed olan el-Hâc Mehmed b. İbrahim meclis-i ma‘kūd-ı mezkûrda bâ‘isü’l-kitâb merkūm el-Hâc Ahmed mahzarında bi’l-vesâye ikrâr ve takrîr-i kelâm edip müteveffâ-yı mezbûr Bağdâdî Şemseddin Efendi b. Abdullah b. Abdullah hâl-i hayâtında işbu mukaffel ve memhûr iki sandığını mezbûr el-Hâc Ahmed’e emânet ve teslîm etmiş idi. El-hâletü hâzihi zikr olunan iki sandığı merkūm el-Hâc Ahmed’e yine mukaffel ve memhûr işbu meclisde bana def‘ u teslîm ben dahi müteveffâ-yı mezbûrun terekesinden olmak üzere yedinden vesâyetim hasebiyle alıp kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc İbrahim b. Hüseyin ve Mehmed Çelebi b. Ahmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 13 min-Cumâdelâhire sene 1143. Şuhûdü’l-hâl: Mahmud Beşe b. Receb, Ali Beşe b. Osman, Halil Çelebi b. Abdullah, el-Hâc Abdurrahman b. Abdullah, Ömer Ağa b. el-Hâc Osman, İbrahim Çelebi b. Abdullah