Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 52 Hüküm no: 38 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manolaki’nin terekesinin taksiminde ortaya çıkan anlaşmazlığın giderildiği Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkin iken târîh-i i‘lâmdan beş sene mukaddem hâlik olan Manolaki v. Mihal nâm hâlikin verâseti li-ebeveyn e[r] karındaşı Mitro ile li-ebeveyn kız karındaşı Panayota’ya münhasıra ba‘dehû merkūm Mitro dahi hâlik olup verâseti sulbî sagīr oğlu Mihalaki ve sulbiye sagīre kızı Simatanya’ya inhisârı ba‘de’t-tahkīkı’ş-şer‘î mezbûre Panayota’nın zevci ve tarafından husûs-ı âti’l-beyanda vekîl-i şer‘îsi ve sagīrân-ı merkūmânın kıbel-i şer‘-i enverden mansûb [vasî]leri işbu bâ‘isü’l-i‘lâm Yorgaki nâm zimmî kasaba-i mezbûrda mütemekkin iken bundan akdem hâlik olan Masteryani? v. Kostantin’in evlâd-ı sıgārının vasiyyeleri Garofolya nâm Nasrâniye muvâcehesinde bi’l-vekâle ve bi’l-vesâye üzerine da‘vâ [ve] takrîr-i kelâm edüp hâlik-i merkūm Manolaki hayâtında târîh-i i‘lâmdan beş sene mukaddem kasaba-i mezbûrede vâki‘ bir bâb mülk bakkāl dükkânını sekiz yüz guruşa hâlik-i merkūm Maşteryani’ye bey‘ u teslîm ve temlîk edüp mübâya‘a hücceti vermeye tarafından vekîl eylediği Yani zimmî Meşeli Ayazma nâm mahâlde vâki‘ etrâf-ı erba‘ası Mitro ve Kostandi mülkleri ve dere ve tarîk-i âm ile mahdûd tahmînen dört dönüm bir kıt‘a yerli bağını fuzûlî mübâya‘a hüccetine idhâl etdirdikde ba‘dehû bâyi‘-i müvekkil-i merkūm Manolaki tarafından husûs-ı mezkûr ol târîhde hâlik-i merkūm Maşteryani’den suâl olundukda bağ-ı mahdûd-ı mezkûr mârrü’z-zikr bakkāl dükkânının mübâya‘a hüccetine fuzûlî idhâl ve tahrîr etdirdiğin ve hâlik-i merkūmun yedinde mülkü olduğunu ikrâr ve istişhâd etmiş iken vasiyye-i mezbûre zevcinin terekesinden olmak zu‘muyla bağ-ı mahdûd-ı mezkûru zevci hâlik-i merkūm Maşteryani’nin defter-i kassâmına idhâl murâd eder deyü ba‘de’d-da‘vâ vasiyye-i mezbûre cevâbında fi’l-hakīka hüccet-i mezbûrda tahrîr olduğuna binâen zevcinin defter-i kassâmına idhâl murâd eylediğini ikrâr lâkin zevci hâlik-i merkūm Maşteryani ber-minvâl-i muharrer hüccet-i mezbûreye fuzûlî idhâl olunduğunu ve hâlik-i merkūm Manolaki’nin hayâtında hüccet-i mezbûra tahrîr olunduğundan sonra merkūm Manolaki’nin mülkü olduğunu ikrâr ve işhâd eylediğini inkâr etmeğin vekîl ve vasiyy-i merkūm Yorgaki müdde‘âsını vech-i meşrûh üzere şuhûd-ı udûl ile ba‘de’l-isbât zevce-i vasiyy-i mezbûre mu‘ârazadan men‘ olunup bağ-ı mahdûd-ı mezkûr tereke-i hâlik-i merkūm Manolaki’den olmak üzere tescîl olunduğu bi’l-iltimâs huzûr-ı âlîlerine i‘lâm olundu. Bâkī emr ü fermân hazret-i men-lehü’l-emrindir. Fî 20 Cemâziyelâhir sene 1177 Uncuzâde Süleyman Efendi i‘lâmıdır.