Bab Mahkemesi 54 Numaralı Sicil (H. 1102 / M. 1691) cilt: 20, sayfa: 91 Hüküm no: 60 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Sefer’in elinde bulunan beygirin Ali b. Resul’e ait olması Mahmiye-i İstanbul’da mekârî tâifesinden Ali b. Resul nâm kimesne meclis-i şer‘-i şerîf-i enverde, Hasan Beşe b. Sefer nâm kimesne mahzarında üzerine da‘vâ ve takrîr-i kelâm edip, işbu meclis-i şer‘de mevcûd ve müşâhede bir re’s kır Bârgir mülküm olup, târih-i kitâbdan bir sene mukaddem mülkümden zâyi‘ etmişdim ve hâlâ zikr olunan Bârgiri mezbûr Hasan Beşe bi gayri hakkın vaz‘-ı yed eder, suâl olunup kasr-ı yedine ve bana teslîme tenbîh olunmak murâdımdır dedikde, gıbbe’s-suâl mezbûr Hasan cevâbında, mârru’z-zikr Bârgirini târih-i kitâbdan sekiz gün mukaddem Şâtıroğlu nâm kimesneden yirmi iki guruş semen-i medfû‘a iştirâ ve kabz edip, mülk-i müşterâm olmak ile vaz‘-ı yed ederim deyu müdde‘î-i mezbûrun ber vech-i muharrer mülkü olduğu ma‘lûmum değildir deyicek, müdde‘î-i mezbûrdan müdde‘âsına mübeyyine beyyine taleb olundukda, udûl-i müslimînden olup Küçük Karaman’da sâkine Abdülkādir b. Ali ve Ali b. Abdullah nâm kimesneler li ecli’ş-şehâde meclis-i şer‘-i şerîfe hâzırân olup isre’l-istişhâd, fi’l-vâki‘ işbu meclis-i şer‘de mevcûd ve müşâhed olan bir re’s kır Bârgir müdde‘î-i mezbûrun mülkü olup, târih-i kitâbdan bir sene mukaddem mülkünden zâyi‘ etmişdi, biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiye şehâdetleri makbûle olup, müdde‘î-i mezbûr tahlîf-i şer‘î ile tahlîf olundukdan sonra mûcebince mârru’z-zikr Bârgiri müdde‘î-i mezbûra red ve teslîm etmek üzre mezbûr Hasan Beşe’ye tenbîh olunup, mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Mustafa b. Şaban, Mehmed b. Ahmed, Mustafa b. Ahmed, Ali b. ( ).