Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 263 Hüküm no: 198 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damat İbrahim Paşa’nın kızı Fatıma Hanım’ın saray denilen büyük evini diğer Fatıma Hanım’a sattığı Uhbirtü bimâ-fîhi nemekahû el-fakīr ileyhi te‘âlâ Dürrî Mehmed el-Kādî bi-askeri Rumeli -gufira lehû- Tahakkuk-ı özr-i şer‘îye binâen hilâl-i sutûrda mastûr husûsun mahâllinde ketb ü tahrîri iltimâs olunmağın cânib-i şer‘den irsâl olunan Mevlânâ Mehmed Efendi b. İbrahim Dârülhilâfeti’l-aliyye Kostantıniye el-mahmiye mahâllâtından Akbıyık mahâllesi ahâlîsinden umdetü’l-ekâbir ve’l-a‘yân sâbıkā Süvârî Mukābelecisi el-Hâc Ali Efendi b. Mehmed Ağa’nın hânesine varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde zikri âtî saray ta‘bîr olunur menzil-i kebîrin nısf-ı şâyi‘ine vâzı‘ü’l-yed [olan] mûmâ-ileyh el-Hâc Ali Efendi hânesinde misâfireten sâkine olup zâtı Kîsedâr Süleyman Ağa b. Hamza mûmâ-ileyh el-Hâc Ali Efendi ta‘rîfleriyle mu‘arrefe olan fahrü’l-muhassanâti’l-mükerreme Fâtıma Hanım bintü’l-vezîri’s-sâbık Dâmâd İbrahim Paşa meclis-i ma‘kūd-ı mezkûrda hâlâ şıkk-ı evvel defterdârı kıdvetü’l-emâcid ve’l-ekârim câmi‘u’l-mehâmid ve’l-mekârim sa‘âdetlü İzzet Ali Beyefendi b. el-merhûm Dâmâd Mehmed Paşa’nın vâlide-i mükerremeleri işbu kitâb-ı sıhhat-nisâbın sâhibesi zahru’l-mestûrâti’l-mufahhama diğer Fâtıma Hanım bt. el-merhûm İbrahim Bey b. Abdullah taraf-ı bâhirü’ş-şereflerinden husûs-ı âti’l-beyanda tasdîka vekîl olduğu hâlâ Başbakıkulu Ahmed Ağa b. el-Hâc Mehmed ve mezbûr Kîsedâr Süleyman Ağa şehâdetleriyle sâbit ve sübût-ı vekâletine hükm olunan hâlâ mâliye tezkerecisi umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam el-Hâc Ahmed Efendi b. İvaz Ağa mahzarında ikrâr-ı tâm ve takrîr-i kelâm edip işbu yedimde olan bir kıt‘a hüccet-i şer‘iyye ve on kıt‘a temessükât mantûkunca zevcim olup bundan esbak maktûlen vefât eden kapudan-ı sâbık merhûm Mustafa Paşa b. Mehmed Bey ile hayâtında ale’l-iştirâki’s-seviy beynimizde silk-i mülkümüzde ve taht-ı tasarrufumuzda mülk ve hakkımız olup mahmiye-i mezbûrede Hocahanı kurbünde ba‘zan Dâye Hatun ve ba‘zan Hobyar mahâllelerinde vâki‘ bir tarafdan han-ı mezkûr ve bir tarafdan ba‘zan benim âhar mülküm ve ba‘zan hâlâ gümrük emîni İbrahim Ağa mülkü ve iki tarafdan tarîk-i âm ile mahdûd hâriciye ve dâhiliyesinde sagīr ve kebîr fevkānî ve tahtânî büyût-ı adîde ve dehliz ve sofa-i müte‘addide ve hamam ve kârgîr havuz-ı kebîr ve kasr-ı satır? ve şükûfe bağçesi ve eşcâr-ı müsmire ve gayr-ı müsmireli hadîkalar ve ahır ve havlu arsası ve kanevât-ı müsennât ile muharrer mâ-i lezîz-i cârîyi muhtevî ve müştemil menzil-i kebîrin nısf-ı şâyi‘ini ve menzil-i mezbûrun hudûdu dâhilinde vâki‘ ma‘lûmü’l-mikdâr arsa-i sırfa medîne-i Gekbûze’de vâki‘ merhûm Gāzî Mustafa Paşa Câmi‘-i şerîf ve medrese-i münîfesi vakfından menzil-i mezbûrun nısfının senede beş yüz akçe mukāta‘a-i kadîmesi ile işbu temessükât mûcebince ma‘lûmü’l-mikdâr havlu arsası ve han-ı mezkûra muttasıl müte‘addid taş odalar Hoca Sadeddin Efendi ve Hâfız Mehmed Efendi ve Gāzî İbrahim Paşa ve Âişe Sultân vakıflarından menzil-i mezbûrun [45a] nısfının yirmi sekiz akçe icâre-i müeccele ve mu‘accele-i ma‘lûme ile menzil-i mezbûrun gerek vakfı ve gerek ebniye-i memlûkesinin nısf-ı şâyi‘ini ve bundan mâ‘adâ menzil-i mezbûrun dâhilinde vâki‘ işbu bir kıt‘a hüccet-i şer‘iyye ve temessük mûcebince müstakilleten yedimde mülk ve hakkım ve taht-ı tasarrufumda olup senede arsasının Elvanzâde Vakfı’na iki bin yedi yüz altmış akçe mukāta‘a-i kadîmesi olan menzilimi dahi ebniye-i memlûke ve arsa-i mezkûre ve cemî‘ tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile on bin guruşa vekîl-i mûmâ-ileyh el-Hâc Ahmed Efendi’ye bey‘ ve temlîk ve teslîm edip ol dahi müvekkilesi mûmâ-ileyhâ Fâtıma Hanım için ber-vech-i muharrer iştirâ ve temellük ve tesellüm ve kabz ve kabûl ettikden sonra semen-i menzil-i mezbûr on bin guruşu müvekkile-i mûmâ-ileyhâ Fâtıma Hanım’ın mâlından olmak üzere vekîl-i mûmâ-ileyh el-Hâc Ahmed Efendi yedinden tamâmen alıp kabz edip min-ba‘d meblağ-ı mezbûr on bin guruşdan müvekkile-i mûmâ-ileyhâ Fâtıma Hanım ile vekîl-i mûmâ-ileyh el-Hâc Ahmed Efendi yedlerinde ve zimmetlerinde bir akçe ve bir habbe bâkī kalmayıp ve arsa-i mevkūfelerini dahi bâ-ma‘rifet-i mütevellî vekîl-i mûmâ-ileyh el-Hâc Ahmed Efendi’ye meccânen ferâğ ve tefvîz eylediğimden sonra ol dahi müvekkilesi mûmâ-ileyhâ Fâtıma Hanım için tefevvüz ve kabûl edip ba‘de’l-yevm hudûd-ı mezkûr ile mahdû[d] menzil-i kebîrin nısf-ı şâyi‘i ile dâhilinde beyan olunan menzilim dahi müvekkile-i mûmâ-ileyhâ Fâtıma Hanım’ın mülk-i şirâsı ve mukāta‘alı arsası dâhil-i havza-i tasarrufu olmuşdur benim kat‘â alâka ve medhalim kalmadı keyfe mâ teşâ’ ve tehtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc Ahmed b. Abdullah ve Mehmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: Umdetü erbâbi’t-tahrîr ve’l-kalem Hazîne Muhâsebecisi Hindî Mehmed Efendi, umdetü erbâbi’t-tahrîr ve’l-kalem Kâtib-i Sipâh Meşhedî? Mehmed Efendi, umdetü’l-eşbâh el-Hâc Osman Ağa kethüdâ-i Fâtıma Sultân, umdetü’l-akrân Mehmed Ağa emîn-i gümrük sâbıkā, umdetü’l-kibâr mûmâ-ileyh el-Hâc Ali Efendi, Osman Ağa kethüdâ-i defterî, umdetü’l-a‘yân Başbakıkulu Ahmed Ağa, Kîsedâr Süleyman Ağa b. Hamza, Halil Ağa b. İbrahim kethüdâ-i merkūm Mustafa Paşa