Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 264 Hüküm no: 199 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şahbaz Hatun’un tek varisi olan Emine Hatun’un mirastan hakkını aldığı Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden mezûnen Mevlânâ el-Hâc İbrahim Efendi irsâl olunup ol dahi mahmiye-i İstanbul’da Mesihpaşa mahâllesinde sâkin es-Seyyid Ahmed Çelebi b. es-Seyyid Cemaleddin’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Ağa Hamamı kurbünde Hatuniye mahâllesinde sâkine iken bundan akdem vefât eden Şahbaz Hatun bt. Abdullah’ın ber-vech-i âtî usûbet-i nesebiye cihetinden vârisi olduğunu iddi‘â edip zâtı ta‘rîf-i şer‘î ile mu‘arrefe olan bâ‘isetü’l-kitâb Emine Hatun bt. Abdullah meclis-i ma‘kūd-ı mezkûrda müteveffât-ı mezbûrenin zâhirde vâris-i ma‘rûfu olmayıp terekesi cânib-i beytülmala âid olmak üzere mahmiye-i mezbûrede sâbıkā beytülmal-ı hâs emîni olup terekesine bi’l-emâne vaz‘ ve ber-vech-i âtî husûmet ve redd-i cevâba kıbel-i şer‘den mezûn olan fahrü’l-akrân İsmail Ağa b. Abdullah Ağa tarafından husûs-ı âti’l-beyanda vekîl-i müsecceli Ahmed Çelebi b. Mustafa ve şerîki es-Seyyid Mustafa Ağa b. el-Hâc Ahmed mahzarında üzerine da‘vâ ve takrîr-i kelâm edip müteveffât-ı mezbûre Şahbaz Hatun b. Abdullah b. Abdullah hayâtında fevtinden yirmi sene mukaddem yedimde câriye-i memlûkem olmağla hasbeten lillâhi te‘âlâ huzûr-ı Müslimînde mâlımdan tahrîr ve i‘tâk etmekle müteveffât-ı mezbûrenin verâseti usûbet-i nesebiye cihetinden bana münhasıra ve terekesine cihet-i merkūmeden benden gayrı vâris ve âhar müstahak yoğ iken mûmâ-ileyhimâ Ahmed Çelebi ve es-Seyyid Mustafa Ağa’nın tereke-i müteveffât-ı mezbûreden ber-mûceb-i defter-i kassâm-ı askerî makbûzlarını taleb eylediğimde vermede ta‘allül ederler suâl olunsun dedikde gıbbe’s-suâl mezbûrân cevâblarında tereke-i müteveffât-ı mezbûreye bi’l-emâne vaz‘-ı yedlerini ikrâr ve müdde‘iye-i mezbûrenin ber-vech-i mübeyyen müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mârrü’z-zikr Mesihpaşa mahâllesinde sâkin es-Seyyid el-Hâc Mustafa Ağa b. es-Seyyid Mehmed Ağa ve mezbûr es-Seyyid Ahmed Çelebi li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Şahbaz Hatun bt. Abdullah b. Abdullah hayâtında fevtinden yirmi sene mukaddem işbu müdde‘iye-i mezbûre Emine Hatun yedinde câriye-i memlûkesi olduğu hâlde hasbeten lillâhi te‘âlâ huzûrumuzda mâlından tahrîr ve i‘tâk etmekle müteveffât-ı mezbûrenin verâseti usûbet-i nesebiye cihetinden müdde‘iye-i mezbûreye münhasıra ve müteveffât-ı mezbûrenin terekesine cihet-i merkūmeden mezbûre Emine Hatun’dan gayrı vâris ve âhar müstahak olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mezbûre Emine Hatun meclis-i mezbûrda mezbûrân Ahmed Çelebi ve es-Seyyid Mustafa Ağa mahzarlarında bi’l-verâse ikrâr ve takrîr-i kelâm edip mûrisem müteveffât-ı mezbûrenin terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî makbûzları olan on beş guruşu bana def‘ u teslîm ben dahi terekeden olmak üzere yedlerinden bi’l-verâse alıp kabz eyledim min-ba‘d meblağ-ı mezbûrdan mezbûrân yedlerinde bir akçe ve bir habbe bâkī kalmayıp tereke-i müteveffât-ı mezbûreden makbûz ve masrûflarına müte‘allıka âmme-i mîrâs da‘vâsından bi’l-verâse zimmetlerini ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Hasan b. Mehmed ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-Cumâdelâhire sene 1143. Şuhûdü’l-hâl: Veli Beşe b. İsmail, Abdurrahman b. Mustafa, Ahmed Çelebi b. Mustafa, el-Hâc İbrahim b. Osman