Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 266 Hüküm no: 200 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un hayattayken sahibi olduğu evi Saliha Hatun’a satmış olduğu Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden mezûnen Mevlânâ el-Hâc İbrahim Efendi irsâl olunup ol dahi mahmiye-i İstanbul’da Tavuk Pazarı kurbünde Hüseyin Ağa Câmi‘-i şerîfi sırasında beytülmal-ı hâs emîni olanlara mahsûs odaya varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Hoca Üveys mahâllesinde sâkine iken bundan akdem vefât eden Hanife Hatun bt. Abdullah’ın zâhirde vâris-i ma‘rûfu olmayıp terekesi cânib-i beytülmala âid olmak üzere mahmiye-i mezbûrede bi’l-fi‘il beytülmal-ı hâs emîni olup terekesine bi’l-emâne vaz‘-ı yed ve husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. el-Hâc Ahmed meclis-i ma‘kūd-ı mezkûrda zâtı ta‘rîf-i şer‘î ile mu‘arrefe olan bâ‘isetü’l-kitâb Saliha Hatun bt. Mehmed mahzarında bi’l-emâne üzerine da‘vâ ve takrîr-i kelâm edip müteveffât-ı mezbûrenin ile’l-vefât yedinde mülk ve hakkı idiği müsbet olup mahâlle-i mezbûrede vâki‘ bir tarafdan Hırka-i şerîf şeyhi menzili ve bir tarafdan Dede Efendi menzili ve bir tarafdan Mirza Halil menzili ve bir tarafdan tarîki âm ile mahdûd fevkānî bir bâb oda ve bir sofa ve tahtânî bir bâb oda ve bir kenîf ve havluyu müştemil seksen guruş kıymetli mülk menzilini mezbûre Saliha Hatun bi-gayrı hakkın zabt edip suâl olunsun dedikde gıbbe’s-suâl mezbûre Saliha Hatun cevâbında menzil-i mahdûd-ı mezbûra vaz‘-ı yedini ikrâr lâkin müteveffât-ı mezbûre Hanife Hatun bt. Abdullah b. Abdullah hâl-i kemâl-i sıhhatinde işbu yedimde olan iki kıt‘a hüccet-i şer‘iyye mûcebince bir def‘a nısfnı elli guruşa ve bir def‘a dahi nısf-ı şâyi‘-i âharını otuz guruşa bana huzûr-ı Müslimînde tarafeynden îcâb ve kabûlü hâvî bey‘-i kat‘î ile cem‘an seksen guruşa bey‘ ve temlîk ve ben dahi ber-vech-i muharrer iştirâ ve temellük ve tesellüm ve kabûl edip semeni olan meblağ-ı mezbûr seksen guruşu yedinden tamâmen ahz u kabz etmekle menzil-i mahdûd-ı mezbûrun mecmû‘u benim mülk-i müşterâm olmuşdu deyü def‘le mukābele edicek gıbbe’l-istintâk ve’l-inkâr mezbûre Saliha Hatun’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden mârrü’z-zikr Hoca Üveys mahâllesinde sâkin Veli Dede b. Ahmed ve Molla Zeyrek mahâllesinde sâkin Osman Beşe b. Hasan li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Hanife Hatun bt. Abdullah b. Abdullah hâl-i kemâl-i sıhhatinde işbu mezbûre Saliha Hatun’un yedinde olan iki kıt‘a hüccet-i şer‘iyye mûcebince mârrü’z-zikr Hoca Üveys mahâllesinde vâki‘ bir tarafdan Hırka-i şerîf şeyhi menzili ve bir tarafdan Dede Efendi menzili ve bir tarafdan Mirza Halil menzili ve bir tarafdan tarîk-i âm ile mahdûd fevkānî bir bâb oda ve bir sofa ve tahtânî bir bâb oda ve bir kenîf ve havluyu müştemil mülk menzilin nısfını bir def‘a elli guruşa ve bir def‘a dahi nısf-ı şâyi‘-i âharını otuz guruşa <> mezbûre Saliha Hatun tarafeynden îcâb ve kabûlü hâvî bey‘-i kat‘î ile cem‘an seksen guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl edip semeni olan meblağ-ı mezbûr seksen guruşu mezbûre Saliha’dan tamâmen ahz u kabz etmekle menzil-i mahdûd-ı mezbûrun mecmû‘u mezbûre Saliha Hatun’un mülk-i müşterâsı olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle <> mezbûre Saliha Hatun ile emîn-i mûmâ-ileyh husûs-ı mezbûra müte‘allık bî-vech mu‘ârazadan men‘ eylediğini mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-Cumâdelâhire sene 1143. Şuhûdü’l-hâl: Hasan b. Abdullah, İbrahim Ağa b. Tezkirecizâde, Mehmed Ağa b. Süleyman Bey, Mustafa Çelebi b. (°), es-seyyid Hüseyin b. Ahmed, es-Seyyid Mehmed b. Ahmed