Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 267 Hüküm no: 201 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun’un kızkardeşi Fatıma Hatun’dan başka varisi olmadığı Kezâlik akd-i meclis-i şer‘-i şerîf ettikde mahmiye-i mezbûrede Arabacı Bâyezid mahâllesinde sâkine iken bundan akdem vefât eden Âişe Hatun bt. Mustafa’nın ber-vech-i âtî li-ebeveyn kız karındaşı olduğunu iddi‘â edip zâtı Molla İbrahim b. Abdullah ve Mehmed b. Mehmed ta‘rîfleriyle mu‘arrefe olan bâ‘isetü’l-kitâb Fâtıma Hatun meclis-i ma‘kūd-ı mezkûrda müteveffât-ı mezbûrenin zâhirde vâris-i ma‘rûfu olmayıp terekesi cânib-i beytülmala âid olmak üzere mahmiye-i mezbûrede bi’l-fi‘il beytülmal-ı hâs emîni olup terekesine vaz‘-ı yed ve ber-vech-i âtî husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. el-Hâc Ahmed mahzarında üzerine da‘vâ ve takrîr-i kelâm edip müteveffât-ı mezbûre Âişe Hatun ile ben li-ebeveyn karındaşlar olup babamız ismi el-Hâc Mustafa ve dedemiz ismi el-Hâc Süleyman ve vâlidemiz ismi Fâtıma bt. Abdullah ve maskat-ı re’simiz medîne-i hazret-i Ebî Eyyûb el-Ensârî -radıye anhü Rabbihi’l-bârî- mahâllâtından Kızıl Mescid mahâllesi olup müteveffât-ı mezbûrenin verâseti zât-ı rahm cihetinden bana münhasıra ve tereke-i müteveffât-ı mezbûreye cihet-i merkūmeden benden gayrı vâris ve âhar müstahak yoğ iken emîn-i mûmâ-ileyh mâni‘ olur suâl olunsun dedikde gıbbe’s-suâl emîn-i mûmâ-ileyh cevâbında tereke-i müteveffât-ı mezbûreye bi’l-emâne vaz‘-ı yedini ikrâr ve müdde‘iye-i mezbûrenin ber-vech-i mübeyyen müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mârrü’z-zikr medîne-i mezbûrede Câmi‘-i kebîr mahâllesinde sâkin Ahmed Beşe b. İbrahim ve İbrahim Beşe b. el-Hâc Hasan li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Âişe Hatun ile işbu müdde‘iye-i mezbûre Fâtıma Hatun li-ebeveyn karındaşlar olup babaları ismi el-Hâc Mustafa ve dedeleri ismi el-Hâc Süleyman ve vâlideleri ismi Fâtıma bt. Abdullah ve maskat-ı re’sleri medîne-i hazret-i Ebî Eyyûb el-Ensârî -radıye anhü Rabbihi’l-bârî- [46a] mahâllâtından Kızıl Mescid mahâllesi olup müteveffât-ı mezbûrenin verâseti zât-ı rahm cihetinden müdde‘iye-i mezbûreye münhasıra ve tereke-i müteveffât-ı mezbûreye cihet-i merkūmeden müdde‘iye-i mezbûreden gayrı vâris ve âhar müstahak olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mezbûre Fâtıma Hatun meclis-i mezbûrda emîn-i mûmâ-ileyh es-Seyyid Mustafa Ağa mahzarında bi’l-verâse ikrâr ve takrîr-i kelâm edip mûrisem müteveffât-ı mezbûrenin terekesi tahrîr ve ba‘de-ihrâci’l-masârıf ve’d-düyûn ber-mûceb-i defter-i kassâm-ı askerî sahhü’l-bâkī kalıp emîn-i mûmâ-ileyhin bi’l-emâne makbûzu olan iki bin üç yüz yetmiş iki akçeyi bana def‘ u teslîm ben dahi tereke-i müteveffât-ı mezbûreden olmak üzere yedinden tamâmen alıp kabz eyledim min-ba‘d meblağ-ı mezbûrdan emîn-i mûmâ-ileyh yedinde bir akçe ve bir habbe bâkī kalmayıp tereke-i müteveffât-ı mezbûreden emîn-i mûmâ-ileyhin makbûz ve masrûfuna müte‘allık da‘vâdan zimmetini ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 16 min-Cumâdelâhire sene 1143. Şuhûdü’l-hâl: Molla İbrahim b. Abdullah, Mehmed Çelebi b. Mehmed, Ahmed Beşe b. Halil, Ahmed Çelebi b. Mehmed, Ali Beşe b. Mustafa, Süleyman Beşe b. Abdullah