Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 288 Hüküm no: 218 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Çelebi’nin Ayşe Hatun’a borcu olduğu Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden mezûnen Mevlânâ es-Seyyid Mahmud Efendi irsâl olunup ol dahi mahmiye-i İstanbul’da Sancakdâr Hayreddin mahâllesinde sâkin iken bundan akdem vefât eden Mustafa Çelebi b. Ömer’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Bostancıbaşı Ali Ağa mahâllesinde sâkine olup zâtı ta‘rîf-i şer‘î ile mu‘arrefe olan bâ‘isetü’l-kitâb Âişe Hatun bt. Abdullah meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve evlâd-ı sıgārı İsmail ve Fâtıma ve Hadîce ve Âişe’nin tesviye-i emrlerine kıbel-i şer‘den mansûbe vasîleri olmağla terekesine bi’l-verâse ve bi’l-vesâye vâzı‘atü’l-yed olup zâtı kezâlik ta‘rîf-i şer‘î ile mu‘arrefe olan Fâtıma Hatun bt. Şaban mahzarında üzerine da‘vâ ve takrîr-i kelâm edip müteveffâ-yı mezbûr Mustafa Çelebi b. Ömer b. Abdullah zimmetinde işbu yedimde olan mu‘anven ve mersûm temessük mûcebince cihet-i karz-ı şer‘îden yüz guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mârrü’z-zikr Sancakdâr Hayreddin mahâllesinde sâkin Mustafa Çelebi b. Ahmed ve Ahmed Çelebi b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Mustafa Çelebi b. Ömer b. Abdullah hâl-i kemâl-i sıhhatinde işbu müdde‘iye-i mezbûre Âişe Hatun’a yedinde olan mu‘anven ve mersûm temessük mûcebince cihet-i karz-ı şer‘îden yüz guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan Mustafa Çelebi b. Ahmed ve diğer Mustafa Çelebi b. el-Hâc Hasan ile meclis-i şer‘a gelip alâ-vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fî 10 Cemâziyelâhire sene 1143 Şuhûdü’l-hâl: el-Hâc Hasan b. Musa, Ali Ağa b. Mustafa, Mehmed Çelebi b. Ali, İbrahim Çelebi b. Ali, Mehmed Çelebi b. Mahmud, Ahmed Bey b. Receb, Mustafa Çelebi b. Hasan.