Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 289 Hüküm no: 219 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep adlı cariyenin Fatıma Hatun’a ait olduğu Kezâlik akd-i meclis-i şer‘-i şerîf ettikde müteveffâ-yı mezbûrun evlâd-ı sıgārı İsmail ve Fâtıma ve Hadîce ve Âişe’ye tashîhen li’d-da‘vâ vasî nasb olunan el-Hâc Hasan b. Musa meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan bâ‘isetü’l-kitâb Fâtıma Hatun bt. Şaban mahzarında üzerine da‘vâ ve takrîr-i kelâm edip işbu orta boylu kara kaşlı kara gözlü Acemiyyetü’l-asl Müslimetü’l-millet Zeyneb bt. Abdullah müteveffâ-yı mezbûrun câriye-i memlûkesi ve terekesinden iken zevce-i mezbûre müstakilleten zabt ve defter-i kassâma idhâlden imtinâ‘ eder, suâl olunsun dedikde gıbbe’s-suâl mezbûre Fâtıma Hatun cevâbında zevcim müteveffâ-yı mezbûr Mustafa Çelebi b. Ömer b. Abdullah’ın mâlından yüz guruş def‘ u teslîm ol dahi meblağ-ı mezbûr ile mevsûfe-i mezbûreyi benim için iştirâ edip hattâ müteveffâ-yı mezbûr hâl-i kemâl-i sıhhatinde mevsûfe-i mezbûreyi ber-vech-i muharrer benim mâlım olan yüz guruş ile benim için iştirâ eylediğini huzûr-ı Müslimînde ikrâr ve işhâd dahi etmekle mevsûfe-i mezbûre Zeyneb benim mülk-i müşterâmdır deyü def‘le mukābele edicek, gıbbe’l-istintâk ve’l-inkâr mezbûre Fâtıma Hatun’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Ali Ağa b. Mustafa ve Mehmed Çelebi b. Ali ve İbrahim Çelebi b. Ali li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr Mustafa Çelebi b. Ömer b. Abdullah hâl-i kemâl-i sıhhatinde zevcem Fâtıma Hatun bana mâlından yüz guruş def‘ u teslîm ben dahi işbu orta boylu kara kaşlı kara gözlü Acemiyyetü’l-asl Müslimetü’l-millet Zeyneb bt. Abdullah nâm câriyeyi meblağ-ı mezbûr ile zevcem merkūme için iştirâ etmekle mevsûfe-i mezbûre Zeyneb zevcem merkūme Fâtıma Hatun’un mülk-i müşterâsıdır deyü huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle vasiyy-i mezbûr el-Hâc Hasan câriye-i mezbûreye müte‘allıka mezbûre Fâtıma Hatun ile bî-vech mu‘ârazadan men‘ olunduğunu mevlânâ-yı mezbûr ilâ âhırihî. Fi’t-târîhi’l-mezbûr. Şuhûdü’s-sâbıkūn.