Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 291 Hüküm no: 221 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin vefatıyla çocuklarına annelerinin vasi tayin edildiği Mahmiye-i İstanbul’da Sancakdâr Hayreddin mahâllesinde sâkin iken bundan akdem vefât eden Mustafa Çelebi b. Ömer’in evlâd-ı sıgārı İsmail ve Fâtıma ve Hadîce ve Âişe’nin tesviye-i emrlerine kıbel-i şer‘den bir vasî nasbı lâzım ve mühim olmağın emânet ve diyânet ile ma‘rûfe ve sadâkat ve istikāmet ile mevsûfe ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sıgār-ı mezbûrûnun vâlideleri işbu bâ‘isetü’l-kitâb Fâtıma Hatun bt. Şaban’ı hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sıgār-ı mezbûrûnun vakt-i rüşd ü sedâdlarına varınca tesviye-i emrlerine vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fî 10 Cemâziyelâhire sene 1143 Şuhûdü’l-hâl: Mustafa Çelebi b. Ahmed, Ahmed Çelebi b. İbrahim, el-Hâc Hasan b. Musa, Ali Ağa b. Mustafa, Mehmed Çelebi b. Ali, İbrahim Çelebi b. Ali, Mehmed Çelebi b. Mahmud, Ahmed Bey b. Receb, Mustafa Çelebi b. Hasan.