Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 291 Hüküm no: 222 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa ve Fatıma Hatun’un kendilerine miras kalan evdeki hisselerini Ümmügülsüm Hatun’a sattıkları Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ İbrahim Efendi b. el-Hâc Yusuf irsâl olunup ol dahi mahmiye-i İstanbul’da Abid Çelebi mahâllesinde sâkin iken bundan akdem vefât eden Arabacı İvaz Beşe b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Fâtıma Hatun bt. Abdullah ile sulbiye kebîre kızı Ümmügülsüm Hatun’a ve usûbet-i nesebiye cihetinden kendüyü i‘tâk eden el-Hâc Mehmed b. Cafer’in sulbî kebîr oğlu Mehmed Ağa’ya münhasıra ve tashîh-i meselesi sekiz sehmden olup sihâm-ı mezbûrenin bir sehmi zevce-i mezbûre Fâtıma Hatun’a ve dört sehmi mezbûre Ümmügülsüm Hatun’a ve bâkī üç sehmi cihet-i mezbûreden mezbûr Mehmed Ağa’ya isâbet eylediği zâhir ve mütebeyyin oldukdan sonra mezbûr Mehmed Ağa meclis-i ma‘kūd-ı mezkûrda müteveffâ-yı mezbûrun sulbiye kebîre kızı olup zâtı el-Hâc Hasan b. Mehmed ve Molla Mustafa b. Hasan ta‘rîfleriyle mu‘arrefe olan sâhibetü’l-kitâb mezbûre Ümmügülsüm Hatun mahzarında bi’l-verâse ikrâr ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı idiği müsbet olup mahâlle-i mezbûrede vâki‘ bir tarafdan el-Hâc Hasan arsası ve bir tarafdan Arabacı İbrahim Çelebi menzili ve bir tarafdan el-Hâc Ahmed Ağa menzili ve bir tarafdan tarîk-i âm ile mahdûd fevkānî iki bâb oda ve bir sofa ve bir kenîf ve tahtânî bir bâb oda ve bir matbâh ve bir kenîf ve bir su kuyusu ve bir mikdâr arsayı müştemil olup arsasının senede merhûm Şeyh Resmi Vakfı’na yüz seksen akçe mukāta‘a-i kadîmesi olan mülk menzilden tashîh-i mezbûr üzere bana isâbet eden üç sehim [hisse-i] şâyi‘amı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Ümmügülsüm Hatun’a yüz guruşa bey‘ ve temlîk ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yüz guruşu mezbûre Ümmügülsüm Hatun yedinden bi’t-tamâm ve’l-kemâl ahz u kabz eyledim, ba‘de’l-yevm hudûd-ı mezkûr ile mahdûd olan menzilin dört sehmi ırsen ve üç sehmi şirâen mezbûre Ümmügülsüm Hatun’un mülkü olup menzil-i mezkûra müte‘allıka da‘vâdan zimmetini ibrâ ve ıskāt eyledim, keyfe mâ teşâ ve tahtâr mutasarrıfa olsun dedikde gıbbe’t-tasdîkı’ş-şer‘î [51b] müteveffâ-yı mezbûrun zevce-i menkûha-i metrûkesi mezbûre Fâtıma Hatun bt. Abdullah b. Abdullah tarafından husûs-ı âti’l-beyanda vekîl olduğu zât-ı mezbûreyi ma‘rifet-i şer‘iyye ile ârifân Molla Ahmed b. Ali ve İbrahim Çelebi b. Mehmed şehâdetleriyle sâbit ve sübût-ı vekâletine hüküm olunan Şeyh el-Hâc Abdullah Efendi b. Yusuf meclis-i ma‘kūd-ı mezkûrda mezbûre Ümmügülsüm Hatun muvâcehesinde bi’l-vekâle ikrâr ve takrîr-i kelâm edip menzil-i mezkûrdan müvekkilem mezbûre Fâtıma Hatun’un hissesine tashîh-i mezkûr üzere isâbet eden bir sehm-i şâyi‘ini tarafeynden îcâb ve kabûlü hâvî bey‘-i bâtt-ı [sahîh-i şer‘î ile] mezbûre Ümmügülsüm Hatun’a kırk guruşa bey‘ ve temlîk ol dahi iştirâ ve temellük ve kabûl eyledikden sonra semeni olan meblağ-ı mezbûr kırk guruşu vekâletim hasebiyle mezbûre Ümmügülsüm Hatun yedinden bi’t-tamâm ve’l-kemâl alıp kabz eyledim, ba‘de’l-yevm menzil-i mezbûrun bir sehmi dahi mezbûre Ümmügülsüm’ün mülk-i sarîhi olup müvekkilem mezbûrenin kat‘â alâkası kalmamışdır, keyfe mâ teşâ ve tahtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan Ahmed Çelebi b. Hasan ve Mehmed Çelebi b. Ali ile meclis-i şer‘a gelip alâ-vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fî 28 min-Cemâziyelâhire sene 1143 Şuhûdü’l-hâl: el-Hâc Ali Efendi b. İbrahim, Halil Efendi b. İbrahim, el-Hâc Ahmed b. Mehmed, el-Hâc Mustafa b. Mehmed, Ömer Çelebi b. Mesud, İbrahim Çelebi b. Mehmed, el-Hâc Hasan b. Mehmed, Molla Mustafa b. Hasan.