Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 293 Hüküm no: 223 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Salih Çelebi hayattayken evini hanımı Havva Hatun’a satmış olduğu Mahmiye-i İstanbul’da Derviş Ali mahâllesinde sâkin iken bundan akdem vefât eden Çukadâr Salih Çelebi b. Zekeriya’nın zâhirde zevce-i menkûha-i metrûkesi Havva Hatun bt. Abdullah’dan gayrı vâris-i ma‘rûfu olmayıp terekesinin rub‘u zevcesi mezbûreye ve selâse-i erbâ‘ı cânib-i beytülmala âid olmağla mahmiye-i mezbûrede bi’l-fi‘il beytülmal-ı hâssa emîni olan fahrü’l-akrân es-Seyyid Mustafa Ağa b. el-Hâc Ahmed meclis-i hatîr-i lâzimü’t-tevkīrde zâtı ta‘rîf-i şer‘î ile mu‘arrefe olan işbu bâ‘isetü’l-kitâb mezbûre Havva Hatun mahzarında bi’l-emâne üzerine da‘vâ ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı olup mahâlle-i mezbûrede vâki‘ bir tarafdan Berber Ahmed Çelebi b. ( ) tasarrufunda olan vakıf menzil ve bir tarafdan Âişe Hatun menzili ve iki tarafdan tarîk-i âm ile mahdûd fevkānî iki bâb oda ve bir sofa ve tahtında bir kenîf ve bi’r-i mâ ve bir mikdâr havluyu müştemil mülk menzilin selâse-i erbâ‘ı cânib-i beytülmala âid olmağla menzil-i mahdûd-ı mezbûrun selâse-i erbâ‘ını zevce-i mezbûreden bi’l-emâne taleb eylediğimde bana teslîmden imtinâ‘ eder, suâl olunsun dedikde gıbbe’s-suâl zevce-i mezbûre Havva Hatun cevâbında fi’l-vâki‘ menzil-i mahdûd-ı mezbûr müteveffâ-yı mezbûrun hayâtında mülkü ve hâlâ yedinde olduğunu ikrâr lâkin zevcim müteveffâ-yı mezbûr Salih Çelebi b. Zekeriya b. Abdullah hâl-i kemâl-i sıhhatinde fevtinden bir sene mukaddem menzil-i mahdûd-ı mezbûru bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile bana huzûr-ı Müslimînde yüz seksen guruşa bey‘ ve temlîk ve teslîm ben dahi temellük ve tesellüm ve kabz ve kabûl edip semeni olan meblağ-ı mezbûr seksen guruşu benden tamâmen ahz u kabz etmekle menzil-i mahdûd-ı mezbûr benim mülk-i müşterâm olmuşdur deyü def‘le mukābele edicek, gıbbe’l-istintâk ve’l-inkâr mezbûre Havva Hatun’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden mahâlle-i mezbûre imamı Ali Efendi b. Mehmed ve Ali Ağa b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Çukadâr Salih Çelebi b. Zekeriya b. Abdullah hâl-i kemâl-i sıhhatinde fevtinden bir sene mukaddem mahâlle-i mezbûrede vâki‘ bir tarafdan Berber Ahmed Çelebi tasarrufunda olan vakıf menzil ve bir tarafdan Âişe Hatun menzili ve iki tarafdan tarîk-i âm ile mahdûd fevkānî iki bâb oda ve bir sofa ve tahtında bir kenîf ve bi’r-i mâ ve bir mikdâr havluyu müştemil mülk menzilini zevcesi işbu mezbûre Havva Hatun’a tarafeynden îcâb ve kabûlü hâvî bey‘-i kat‘î ile huzûrumuzda yüz seksen guruşa bey‘ ve temlîk ve teslîm ol dahi temellük ve tesellüm ve kabz ve kabûl edip semeni olan meblağ-ı mezbûru zevce-i mezbûreden tamâmen ahz u kabz etmekle menzil-i mahdûd-ı mezbûr zevce-i mezbûre Havva Hatun’un mülk-i müşterâsı olmuşdur, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle zevce-i mezbûre Havva Hatun ile emîn-i mûmâ-ileyh es-Seyyid Mustafa Ağa bî-vech mu‘ârazadan men‘ birle mâ vaka‘a bi’t-taleb ketb olundu. Fî 14 min-Cemâziyelâhire sene 1143. Şuhûdü’l-hâl: Ahmed Ağa b. Mustafa, Ömer Ağa b. Halil, Hüseyin Beşe b. Ali, Ahmed Çelebi b. İsmail, Ahmed b. Hasan, Ahmed Çelebi b. Mehmed