Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 294 Hüküm no: 224 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola’nın ölmüş olan David’de alacağı olduğu Tahakkuk-ı özr-i şer‘îye binâen hilâl-i sutûrda [mastûr olan] husûsun mahâllinde istimâ‘ ve tahrîri için savb-ı şer‘-i enverden mezûnen irsâl olunan Mehmed Efendi b. İbrahim mahmiye-i İstanbul’da el-Hâc Timur mahâllesinde mütemekkin askerî tâifesinden olup bundan akdem hâlik olan Kürkçü David v. Kohi nâm Nasrânînin mahmiye-i mezbûrede Mahmudpaşa Hanı’nda vâki‘ odasına varıp zeyl-i kitâbda mastûrü’l-esâmi kimesneler muvâcehesinde akd-i meclis-i şer‘-i şerîf ettikde han-ı mezkûrda mütemekkin hâmilü’s-sifr Nikola v. Dimitri meclis-i ma‘kūd-ı mezkûrda hâlik-i mesfûrun anası olmağla terekesine bi’l-verâse vâzı‘atü’l-yed olan Cevherya bt. Yorgi tarafından husûs-ı âti’l-beyanda bâ-hüccet-i şer‘iyye vekîli ve mesfûr Cevherya’nın kebîr oğlu Palaşa v. Kohi nâm Nasrânî muvâcehesinde üzerine da‘vâ ve takrîr-i kelâm edip hâlik-i merkūm David v. Kohi v. Yorgi zimmetinde cihet-i karz-ı şer‘îden beş yüz guruş hakkım olup hattâ hâlik-i merkūm hayâtında he[lâ]kinden kırk gün mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu Nasârâ tâifesinin muvâcehesinde ikrâr ve işhâd edip kable’l-edâ helâk olmağla terekesinden taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i Nasârâdan olup han-ı mezkûrda mütemekkin Manol v. Kiryazi ve Anaştaş v. Panayot nâm Nasrânîler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka hâlik-i merkūm David v. Kohi v. Yorgi hayâtında helâkinden kırk gün mukaddem işbu müdde‘î-i mesfûr Nikola’ya cihet-i karz-ı şer‘îden beş yüz guruş zimmetinde vâcibü’l-edâ deyni olduğunu muvâcehemizde ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan Çukadâr el-Hâc Ahmed b. Ali ve diğer Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 21 min-Cemâziyelâhire sene 1143. Şuhûdü’l-hâl: Hancı Süleyman Ağa b. Ali, Molla İbrahim b. Mehmed, Halil Çelebi b. Musa, Ahmed Çelebi b. el-Hâc Mehmed, İbrahim Ağa b. Mehmed, İbrahim Çelebi b. İsmail, Hıristo v. Papa Kiryani, Marayko v. Kiryaki, Angeli v. Mihal, Kostantin v. Nikola, Tanaş v. Komender, Osteban v. Todori, Angeli v. Yani, Manol v. Kiryaki, Mihal v. Kirko