Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 295 Hüküm no: 225 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş’ın ölmüş olan David’de alacağı olduğu Kezâlik akd-i meclis-i şer‘-i şerîf ettikde han-ı mezkûrda mütemekkin hâmilü’s-sifr Anaştaş v. Panayot nâm Nasrânî meclis-i ma‘kūd-ı mezkûrda hâlik-i mesfûrun anası olmağla terekesine bi’l-verâse vâzı‘atü’l-yed olan Cevherya bt. Yorgi tarafından husûs-ı âti’l-beyanda bâ-hüccet-i şer‘iyye vekîli ve mesfûre Cevherya’nın kebîr oğlu Palaşa v. Kohi nâm Nasrânî muvâcehesinde üzerine da‘vâ ve takrîr-i kelâm edip hâlik-i mesfûr David v. Kohi v. Yorgi zimmetinde bir buçuk senede kürkçülük ücretinden yüz yirmi guruş hakkım olup hattâ hâlik-i mesfûr helâkinden kırk gün mukaddem meblağ-ı merkūm cihet-i mezkûreden zimmetinde bana vâcibü’l-edâ deyni olduğunu Nasârâ muvâcehesinde ikrâr ve işhâd edip kable’l-edâ helâk olmağla terekesinden taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i Nasârâdan olup han-ı mezkûrda mütemekkin Nikola v. Dimitri ve Yorgi v. Hürmüz nâm Nasrânîler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka hâlik-i mesfûr David v. Kohi v. Yorgi hayâtında helâkinden kırk gün mukaddem işbu müdde‘î-i mesfûr Anaştaş Nasrâniye zimmetinde bir buçuk senede kürkçülük ücretinden yüz yirmi guruş vâcibü’l-edâ deyni olduğunu muvâcehemizde ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm vâki‘ hâli ilâ-âhırihî. Fi’t-târîhi’l-mezbûr seneti’l-mezbûre. Şuhûdü’s-sâbıkūn