Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 295 Hüküm no: 226 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen David’in eşi Kokona’nın doğmamış çocuğuna tahsis edilen paradan borç alındığı Kezâlik akd-i meclis-i şer‘-i şerîf ettikde hâlik-i mesfûrun li-ebeveyn karındaşı Palaşa v. mesfûr Kohi ile han-ı mezkûrda mütemekkin Anaştaş v. Panayot nâm Nasrânîler meclis-i ma‘kūd-ı mezkûrda hâlik-i mesfûrun firâşından hâsıl zevcesi Kokona Nasrâniyenin batnında müstebîn hamlin hisse-i merkūmesini ahz u kabz ve zabt u rabta ve bi’l-cümle tesviye-i umûruna cânib-i şer‘den vasî ve kayyım nasb olunan mesfûre Kokona bt. Panayot tarafından vekîl-i müsecceli işbu hâmilü’s-sifr İsteban v. Todori muvâcehesinde her biri ikrâr ve takrîr-i kelâm edip haml-i mezkûrun hisse-i mevkūfesinden olup vekîl-i mesfûr yedinden istidâne ve kabz eylediğimiz bin sekiz yüz kırk dört guruş ile semeni târîh-i kitâbdan üç yüz altmış bir gün tamâmına değin müeccel ve mev‘ûd yine haml-i mezkûrun hisse-i mevkūfesinden olup vekîl-i mesfûr yedinden iştirâ ve kabz eylediğimiz [52b] bir samur paçası kürk bahasından dahi yüz seksen dört guruş ki cem‘an iki bin yirmi sekiz guruş haml-i mesfûra zimmetimizde vâcibü’l-edâ deynimizdir ve meblağ-ı mezkûr iki bin yirmi sekiz guruşa tarafeynden emr ve kabûlü hâviye kefâlet-i sahîha-i şer‘iyye ile her birimiz âharın zimmetinden lâzım gelen meblağa kefil ve zâmin olduk dediklerinde gıbbe’t-tasdîkı’ş-şer‘î vâki‘ hâli ilâ-âhırihî. Fi’t-târîhi’l-mezbûr seneti’l-merkūme. Şuhûdü’s-sâbıkūn