Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 296 Hüküm no: 227 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hanım’ın kendi vasiyetini yerine getirmek üzere Mustafa Çelebi’yi vasi tayin ettiği Husûs-ı âti’l-beyanın mahâllinde ketb ü tahrîri için savb-ı şer‘-i enverden bi’t-taleb Mevlânâ Sadi Ali Efendi irsâl olunup ol dahi mahmiye-i İstanbul’da Yeniodalar kurbünde Molla Fenârî mahâllesinde sâkine fahrü’l-muhadderât Fâtıma Hanım bt. Cafer Ağa b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde zâtı Mustafa Çelebi b. Ali ve Mustafa Beşe b. Mehmed ta‘rîfleriyle mu‘arrefe olan mezbûre Fâtıma Hanım bt. Cafer Ağa meclis-i ma‘kūd-ı mezkûrda karındaşı oğlunun oğlu işbu bâ‘isü’l-kitâb Mustafa Ağa b. Ahmed mahzarında ikrâr ve takrîr-i kelâm edip bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup elli guruş ile vech-i mesnûn üzere levâzım-ı techîz ve tekfînim görülüp ve düyûn-ı müsbetem edâ olundukdan sonra bâkī kalan cemî‘ terekemin sülüsü ifrâz olunup sülüs-i mezbûrdan otuz guruş ile ıskāt-ı salâtım oluna ve yirmi guruş yirmi nefer sülehâdan kimesnelere verilip onlar dahi yetmiş bin tevhîd-i şerîf tilâvet edip kemâl-i keremlerinden sevâbını rûhuma ihdâ eyleyeler ve on beş guruş on beş nefer hâfızlara verilip onlar dahi kabrim üzerinde bir hatm-i şerîf tilâvet edip sevâbını kemâl-i keremlerinden rûhuma ihdâ eyleyeler ve onar guruşa iki mushaf-ı şerîf iştirâ olunup müstahakkına verile ve elli guruş ile eyyâm-ı mübârekede tabh-ı ta‘âm ve it‘âm-ı fukarâ oluna ve yirmi beş guruş fukarâ-yı Müslimîne tasadduk oluna ve dört yüz guruş el-Hâc Hüseyin nâm kimesne[ye] verilip ol dahi benim için hacc-ı şerîf eyleye ve otuz guruş mezbûr Mustafa Ağa’nın vâlidesi Ümmügülsüm Hatun’a verile ve on guruş büyük vâlidesi Âişe Hatun’a verile ve on beş guruş Dâyezâde Ümmühani Hatun’a verile ve on guruş mütevellî zevcesi Afife Hatun’a verile ve beş guruş Analık Âişe Hatun’a verile ve on guruş …? Fâtıma Hatun’a verile ve beş guruş diğer Fâtıma Hatun’a verile ve sülüs-i mezbûrdan her ne fazla kalırsa vasiyy-i muhtârım nasb u ta‘yîn eylediğim işbu mezbûr Mustafa Ağa kendi için ahz u kabz edip kendi masârıfına sarf eyleye deyü vasiyet ve tenfîzine merkūm Mustafa Ağa’yı vasiyy-i muhtâr nasb u ta‘yîn eyledim dedikde ol dahi muvâcehesinde ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm eylediğini mevlânâ-yı mezbûr mahâllinde tahrîr ba‘dehû ma‘an irsâl olunan Ali Çelebi b. İbrahim ve Hasan b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 23 min-Cemâziyelâhire sene 1143. Şuhûdü’l-hâl: Yazıcı Mehmed Ağa b. İbrahim, Halil Efendi b. Mehmed Efendi, el-Hâc Mustafa b. Ahmed Attâr, Mustafa Çelebi b. Ali Müezzin-i Câmi‘-i Evlice, Ali Beşe b. Mustafa Hisarlı, Mehmed Beşe b. Süleyman, Ömer Beşe b. Abdullah, İsmail Çavuş Ağa b. Osman, Müezzin Molla Mustafa b. Mehmed, Molla Musa b. Mustafa Müezzin, Mehmed Beşe b. Süleyman