Bab Mahkemesi 54 Numaralı Sicil (H. 1102 / M. 1691) cilt: 20, sayfa: 94 Hüküm no: 63 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Sinan Paşa’nın eski eşi Mehmed Ağa b. Osman’da nafaka alacağı kalmadığı Yoros kazâsına tâbi‘a Kanlıcak nâm karye sâkinelerinden Fâtıma Hanım bt. Sinan Paşa nâm hâtun ba‘de’t-ta‘rîfi’l-mu‘teber meclis-i şer‘-i şerîf-i enverde sâbıkan zevci olan Mehmed Ağa b. Osman tarafından husûs-ı âti’l-beyâna vekîl olduğu İbrahim b. Hasan ve Ali b. Hasan şehâdetleriyle sâbit olan Mustafa Çavuş b. Mehmed nâm kimesne mahzarında ikrâr ve takrîr-i kelâm edip, zevcim mezbûr Mehmed Ağa zimmetinde yedimde olan hüccet nâtıka olduğu üzre nafaka-i mefrûzamdan üç yüz guruş olup, iki yüz guruşunu bedel-i hul‘ olmak üzre mukaddemâ fâriğa olup, yüz guruşu zimmetinde bâkī kalmışdı. Hâlâ meblağ-ı bâkī yüz guruşu dahi bi’t-tamâm ahz u kabz ettiğimden sonra husûs-ı mezkûr ve hukūk-ı zevciyyete müte‘allika cemî‘ da‘vâdan ben bi’l-asâle mezbûr Mehmed Ağa’nın zimmetini ibrâ ve iskāt edip ve mezbûr Mehmed Ağa tarafından bi’l-vekâle mezbûr Mustafa Çavuş dahi meblağ-ı mezbûra ve gayra müte‘allika âmme-i da‘vâdan benim ve zimmetimi ibrâ ve iskāt eyledi. Ba‘de’l-yevm birbirimiz ile da‘vâ ve nizâ‘ımız kalmadı dedikde, gıbbe’t-tasdîki’l-vicâhi’l-mu‘teber mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mehmed Çelebi b. Mehmed, İbrahim Çelebi b. Ahmed, İbrahim Ağa b. ( ), Mehmed Çelebi b. ( ), İbrahim b. Hasan, Ali Çelebi b. Hasan.