Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 308 Hüküm no: 239 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Ali’nin vefat eden Attar Ali’de alacağı olduğu Kezâlik akd-i meclis-i şer‘-i şerîf ettikde mahmiye-i mezbûre[de] Unkapanı sûkunda mütemekkin bâ‘isü’l-kitâb Duhânî el-Hâc [Ali] b. Mustafa meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla tereke-i hâzırasına bi’l-vesâye vâzı‘ü’l-yed olan Berber Mehmed Çelebi b. Ali mahzarında üzerine da‘vâ ve takrîr-i kelâm edip müteveffâ-yı mezbûr Attâr el-Hâc Ali b. Ali b. Abdullah zimmetinde işbu yedimde olan temessük mûcebince yedinden müşterâ ve makbûz vezn ve kıymeti beynimizde ma‘lûm Yenice duhânı bahasından ba‘de-külli’l-hesâb yirmi iki bin iki yüz kırk akçe hakkım olup hattâ müteveffâ-yı mezbûr hayâtında fevtinden üç gün mukaddem meblağ-ı merkūm cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla tereke-i kāsırasından taleb ederim, suâl olunup alıverilmek matlûbumdur dedikde gıbbe’s-suâl vasiyy-i mezbûr cevâbında terekeye bi’l-vesâye vaz‘-ı yedini ikrâr lâkin müdde‘î-i mezbûrun ber-vech-i muharrer müdde‘âsını inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre sükkânından es-Seyyid Ahmed Efendi b. es-Seyyid Ali ve Ali Ağa b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Attâr el-Hâc Ali b. Ali b. Abdullah hâl-i hayâtında fevtinden üç gün mukaddem işbu müdde‘î-i mezbûr el-Hâc Ali’ye yedinde olan temessük mûcebince vezn ve kıymeti beynimizde ma‘lûm yedinden müşterâ ve makbûz Yenice duhânı bahasından ba‘de-külli’l-hesâb yirmi iki bin iki yüz kırk akçe zimmetinde vâcibü’l-edâ deynimdir deyü huzûrumuzda ikrâr ve bizi işhâd eyledi, biz bu husûsa ilâ-âhırihî gıbbe’t-tahlîfi’ş-şer‘î mûcebiyle ba‘de’l-hükm mürsel mezbûrân. Fi’t-târîhi’l-mezbûr li-seneti’l-merkūme. Eş-şâhid[ûn]ü’s-sâbıkūn