Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 317 Hüküm no: 251 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolancı Süleyman Ağa’nın varislerinin vekilleri olan Ali’nin zimmetini ibra ettikleri Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i şerîf-i enverden Mevlânâ Burusî Mehmed Efendi irsâl olunup ol dahi mahmiye-i İstanbul’da Emin Sinan mahâllesinde el-Hâc Ali b. Ömer’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede el-Hâc Hasan mahâllesinde sâkin iken bundan akdem vefât eden Kolancı Süleyman Ağa b. el-Hâc Salih’in verâseti zevce-i menkûha-i metrûkesi Hadîce Hatun bt. Abdullah ile li-eb kız karındaşı ve menzil-i mezbûre[de] sâkine Ümmühani Hatun’a münhasıra olup ba‘dehû mezbûre Ümmühani Hatun dahi vefât edip verâseti zevc-i metrûkü Ömer Efendi b. Mehmed ile sadrî kebîr oğlu Hüseyin ve sadriye kebîre kızları Fâtıma Hatun ile Âişe Hatun’a münhasıra olduğu şer‘an zâhir ve mu‘ayyen oldukdan sonra mezbûrân Ömer Efendi ve Hüseyin ile zâtları ta‘rîf-i şer‘î ile mu‘arrefe olan mezbûrân Fâtıma ve Âişe Hatunlar meclis-i ma‘kūd-ı mezkûrda müteveffât-ı mezbûre Ümmühani Hatun’un dâmâdı ve vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan mezbûr el-Hâc Ali’nin mahzarında her biri bi’l-asâle ikrâr ve takrîr-i kelâm edip mezbûr el-Hâc Ali mûrisemiz müteveffât-ı mezbûre Ümmühani Hatun’un hayâtında vekîli ve ba‘de-vefâtihâ bâ-hüccet-i şer‘iyye vasiyy-i muhtârı olmağla terekesi ve müteveffâ-yı evvel-i mezbûr Süleyman Ağa’nın terekesinden isâbet eden hisse-i ırsiyesini kabz ve düyûn-ı müsbetesine ve masrûfât-ı sâiresine sarf edip ancak yedinde yedi yüz otuz beş akçe bâkī kalmağla meblağ-ı mezbûr yedi yüz otuz beş akçe mutâlebesinden mezbûr el-Hâc Ali’nin zamân-ı vekâletinde ve zamân-ı vesâyetinde cemî‘ makbûz ve masrûfuna müte‘allıka âmme-i de‘âvî ve mutâlebât ve eymân ve muhâsamâtdan zimmetini ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel Ahmed Çelebi b. İsmail ve Mehmed b. Ahmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 15 min-Cemâziyelâhir sene 1143. Şuhûdü’l-hâl: el-Hâc Mehmed Efendi b. İbrahim, Halil Efendi b. Hasan, Hacı Hızır b. Ahmed, Hacı Mehmed b. Himmet, Hacı b. Mustafa, Hacı Esad b. Hüseyin, İbrahim b. Hüseyin, Mehmed b. Hüseyin