Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 318 Hüküm no: 252 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolancı Süleyman Ağa’nın varislerinin vasi Abdullah Çelebi’nin zimmetini ibra ettikleri Kezâlik münhasıra oldukdan sonra müteveffât-ı mezbûre Ümmühani Hatun’un dâmâdı ve hayâtında vekîli ve bâ-hüccet-i şer‘iyye vasiyy-i muhtârı olan mezbûr el-Hâc Ali ile mezbûr Ömer Efendi ve mezbûr Hüseyin ve zâtları ta‘rîf-i şer‘î ile mu‘arrefe olan mezbûre Fâtıma Hatun ve Âişe Hatun meclis-i ma‘kūd-ı mezkûrda müteveffâ-yı evvel-i mezbûr Kolancı Süleyman Ağa’nın vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan bâ‘isü’l-kitâb es-Seyyid Abdullah Çelebi b. Mehmed mahzarında her biri bi’l-asâle ve bi’l-vesâye ikrâr ve takrîr-i kelâm edip müteveffâ-yı evvel-i mezbûr Kolancı Süleyman Ağa’nın terekesini tahrîr ve ba‘de-ihrâci’l-masârıf ber-mûceb-i defter-i kassâm-ı askerî mûrisemiz müteveffât-ı mezbûre Ümmühani Hatun’un hissesine tereke-i menkūlesi semeninden isâbet eden elli dört bin altı yüz kırk iki akçenin yirmi yedi bin akçesini mezbûre Ümmühani Hatun vasiyy-i mezbûr es-Seyyid Abdullah Çelebi yedinden kendi kabz edip ba‘de-vefâtihâ bâkī yirmi yedi bin altı yüz kırk iki akçesini dahi mezbûr el-Hâc Ali vesâyeti hasebiyle müteveffâ-yı evvel-i mezbûrun terekesinden olmak üzere vasiyy-i mezbûr es-Seyyid Abdullah Çelebi yedinden kabz edip ve müteveffâ-yı evvel-i mezbûrun zikr olunan el-Hâc Hasan mahâllesinde vâki‘ bey‘ olunan mülk menzili semeninden dahi mûrisemizin hissesine isâbet eden kırk dokuz bin iki yüz doksan bir akçeyi vasiyy-i mezbûr bize def‘ u teslîm, biz dahi ber-vech-i muharrer meblağ-ı mezkûru bi’l-asâle ve bi’l-vesâye vasiyy-i mezbûr es-Seyyid Abdullah Çelebi yedinden bi’t-tamâm ve’l-kemâl alıp kabz eyledik, min-ba‘d mûrisemiz müteveffât-ı mezbûrenin hisse-i mezkûrelerinden vasiyy-i mezbûr yedinde bir akçe ve bir habbe hakkımız bâkī kalmayıp zamân-ı vesâyetinde cemî‘ makbûz ve masrûfuna müte‘allıka âmme-i da‘vâdan mezbûr es-Seyyid Abdullah Çelebi’nin zimmetini ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli ilâ-âhırihî. Fi’t-târîhi’l-mezbûr li-seneti’l-merkūme. Eş-şâhid[ûnü’s]-sâbıkūn