Bab Mahkemesi 54 Numaralı Sicil (H. 1102 / M. 1691) cilt: 20, sayfa: 95 Hüküm no: 65 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın varislerinin Hacı Mustafa b. Abdurrahman Vakfı’na borçlarını ödemesi Merhûm el-Hâc Mustafa b. Abdurrahman nâm sâhibü’l-hayrın mahmiye-i İstanbul’da Sofular mahallesinde vâki‘ mekteb için mevkūfe nukūda bi’l-fi‘il mütevellî olan bâ‘isü hâze’l-kitâb Mehmed Çelebi b. Mustafa nâm kimesne meclis-i şer‘-i şerîf-i enverde, bundan akdem Vidin’de vefât eden birinci bölük yoldaşlarından Topal Mehmed Beşe b. Abdullah b. Abdülmennân’ın verâseti, zevcesi Fâtıma Hâtun ile sulbî kebîr oğulları Ömer ve Yusuf nâm kimesnelere münhasıra olduğu mütehakkik oldukdan sonra terekesine vâzı‘u’l-yed olan mezbûr Ömer mahzarında bi’t-tevliye üzerine da‘vâ ve takrîr-i kelâm edip, mezbûr Mehmed Beşe bundan akdem mâl-ı vakf-ı mezbûr olan üç yüz guruşu ve vâkıf-ı mezbûrun kardeşi Ahmed Beşe nâm müteveffânın terekesinden bi’t-tamâm ahz u kabz edip, hattâ mezbûr Mehmed Beşe hâl-i hayâtında mâl-ı vakf-ı mezbûra el-ân üç yüz guruş makbûzum olup, hâlâ yedimdedir deyu ikrâr ve işhâd edip vefât etmekle, hâlâ terekesine vâzı‘u’l-yed olan oğlu mezbûr Ömer’e suâl olunup mâl-ı vakf-ı mezbûr olan meblağ-ı mezbûr Ömer terekesinden bana edâya tenbîh olunmak bi’t-tevliye matlûbumdur dedikde, gıbbe’s-suâl mezkûr Ömer cevâbında, tereke-i müteveffâ-yı merkūma vaz‘-ı yedini ikrâr, lâkin husûs-ı mezkûr[u] inkâr edicek, mütevellî-i mezbûrdan müdde‘âsını mübeyyine beyyine taleb olundukda, udûl-i müslimînden olun mahalle-i mezbûre ahâlîsinden Haffâf oğlu Ali Çelebi b. Abdurrahman ve Murad Paşa İmâmı Mehmed Efendi b. Mehmed nâm kimesneler li ecli’ş-şehâde meclis-i şer‘-i şerîf-i enverde hâzırân olup istişhâd olunduklarında, fi’l-hakīka müteveffâ-yı mezbûr Topal Mehmed Beşe b. Abdullah b. Abdurrahman bundan akdem Hamal Hayrullâh vâkıf-ı mezbûr el-Hâc Mustafa’nın mârru’z-zikr mekteb için vakfı olan asl-ı mâl-ı mezbûr üç yüz guruşu müteveffâ-yı mezbûr Ahmed Beşe’nin muhallefâtından kabz edip, hâlen benim yedimdedir deyu bizim huzûrumuzda ikrâr ve bizi işhâd eyledi. Biz bu husûsa bu vech üzre şâhid[leriz], şehâdet dahi ederiz deyu her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olup, müdde‘î-i mezbûr dahi ba‘de’t-tahlîf, mûcebince meblağ-ı mezbûr üç yüz guruşu müteveffâ-yı mezbûr Topal Mehmed Beşe’nin terekesinden mütevellî-i mezbûra teslîm etmek üzre oğlu mezbûr Ömer’e tenbîh olundukdan sonra mütevellî-i mezbûr meclis-i şer‘de bi’t-tevliye ikrâr ve takrîr-i kelâm edip, mezbûr Ömer’e ânifen edâsına tenbîh olunan meblağ-ı mezbûr için her yüz otuz beşi bir guruşa olmak üzre tereke-i müteveffâ-yı mezbûrdan üç yüz guruşluk mangırı bana teslîm, ben dahi bi’t-tevliye kabz ve tesellüm eyledim. Min ba‘d meblağ-ı mezbûrdan bir akçe ve bir habbe bâkī kalmamışdır dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel sene 1102. Şuhûdü’l-hâl: Mehmed Çelebi b. Himmet, Hüseyin Çelebi b. Mustafa, Mehmed Beşe b. Hasan, Mehmed Çelebi b. Mehmed, Mehmed Çelebi b. ( ).