Bab Mahkemesi 54 Numaralı Sicil (H. 1102 / M. 1691) cilt: 20, sayfa: 96 Hüküm no: 66 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in evini Hacı Ali b. Bedreddin’e satması Mahmiye-i İstanbul’da Sultan Selim Câmi‘-i şerîfi kurbunda Çukur Sinan mahallesinde sâkine Ayşe bt. Mehmed nâm hâtun ba‘de ta‘rîfi’ş-şer‘î meclis-i şer‘-i şerîf-i enver ve mahfil-i dîn-i münîf-i ezherde, bâ‘isü hâze’l-kitâb el-Hâc Ali b. Bedreddin nâm kimesne mahzarında [11a] ikrâr ve takrîr-i kelâm edip, akd-i âti’z-zikrin sudûruna değin yedimde mülk ve hakkım olup arsasının senede Sivasî Efendi zâviyesine otuz akçe mukāta‘a-i kadîmesi olan mahalle-i mezbûrede vâki‘ bir tarafdan âhar mülküm ve bir tarafdan Ali oğlu Mehmed mülkü ve bir tarafdan tarîk-i hâs ve bir tarafdan câmi‘-i şerîf duvarı ile mahdûd, fevkānî bir bâb oda ve tahtânî bir bâb ve bir sofa ve bir kenîf ve bir mikdâr avluyu müştemil mülk menzilini, bi cümleti’t-tevâbi‘ ve’l-levâhık ve kâffe-i hukūku ve merâfıkı ile mezbûr el-Hâc Ali’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa bey‘ ve teslîm, ol dahi ber vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr yüz guruşu mezbûr el-Hâc Ali yedinden tamâmen ahz u kabz eyledim. Ba‘de’l-yevm menzil-i mahdûd-ı mezkûr mezbûr el-Hâc Ali’nin mülk-i müşterâsıdır. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel sene 1102. Şuhûdü’l-hâl: İmâm Ali Efendi b. Mehmed, el-Hâc Aziz b. Şaban, Mehmed b. Ali Bey, İsâ Çelebi b. İbrahim, Mehmed b. Himmet, Mehmed Çelebi b. İdris, Mellâh Şaban b. ( ), Hüseyin b. Ali, İsâ b. Abdullah, İsâ b. Hasan.