Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 324 Hüküm no: 258 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki b. Taha’nın vefat eden Ali Ağa’da alacağı olduğu Husûs-ı âti’z-zikrin mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ Abdullah Efendi b. el-merhûm İbrahim Efendi irsâl olunup ol dahi mahmiye-i İstanbul’da Serv[i] mahâllesinde sâkin iken bundan akdem vefât eden Ali Ağa b. İbrahim’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde işbu bâ‘isü’l-kitâb es-Seyyid Abdülbaki b. es-Seyyid Taha meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan Emetullah Hatun bt. Mehmed Ağa ile müteveffâ-yı mezbûrun li-ebeveyn kız karındaşı olup zâtı kezâlik ta‘rîf-i şer‘î ile mu‘arrefe ve tereke-i müteveffâ-yı mezbûra bi’l-verâse vâzı‘atü’l-yed olan Âişe Hatun mahzarında ikrâr ve takrîr-i kelâm edip müteveffâ-yı mezbûr Ali Ağa b. İbrahim zimmetinde işbu yedimde olan mümzâ ve mahtûm deyn temessükü mûcebince cihet-i karz-ı şer‘îden yirmi yedi bin üç yüz doksan akçe hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Mustafa Ağa b. Süleyman ve es-Seyyid Halil Ağa b. es-Seyyid Burhaneddin li-ecli’ş-şehâde meclis-i ma‘kūd-ı mezkûre hâzırân olup isre’l-istişhâd fi’l-hakīka müteveffâ-yı mezbûr Ali Ağa b. İbrahim b. Süleyman hâl-i kemâl-i sıhhatinde işbu müdde‘î-i mezbûr es-Seyyid Abdülbaki Ağa’ya yedinde olan mümzâ ve mahtûm deyn temessükü mûcebince cihet-i karz-ı şer‘îden yirmi yedi bin üç yüz doksan akçe zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan el-Hâc İbrahim b. Hüseyin ve el-Hâc Mehmed b. İbrahim ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 20 min-Cemâziyelâhir sene 1143. Şuhûdü’l-hâl: Hüseyin Efendi b. Ali, Ali Ağa b. Hasan, Süleyman Ağa b. Abdullah, Ali Çelebi b. Abdullah, Mehmed Ağa b. Abdullah