Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 325 Hüküm no: 260 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’un vefat eden kocası Ali Ağa’nın terekesinden mehir alacağı olduğu Kezâlik akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Emetullah Hatun bt. Mehmed Ağa meclis-i ma‘kūd-ı mezkûrda müteveffâ-yı mezbûrun li-ebeveyn kız karındaşı olmağla terekesine bi’l-verâse vâzı‘atü’l-yed olup zâtı kezâlik ta‘rîf-i şer‘î ile mu‘arrefe olan Âişe Hatun mahzarında üzerine da‘vâ ve takrîr-i kelâm edip zevcim müteveffâ-yı mezbûr Ali Ağa b. İbrahim b. Süleyman zimmetinde mütekarrer ve ma‘kūdün-aleyh on beş bin akçe mehr-i müeccel hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin el-Hâc Mehmed Ağa b. Abdullah ve Ali Ağa b. Ömer li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Ali Ağa b. İbrahim b. Süleyman hâl-i kemâl-i sıhhatinde zevcesi işbu müdde‘iye-i mezbûre Emetullah Hatun’a zimmetinde mütekarrer ve ma‘kūdün-aleyh on beş bin akçe mehr-i müeccel deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahâllinde tahrîr ve mürsel mezbûrân. Fi’t-târîhi’l-mezbûr li-seneti’l-merkūme. Eş-şâhid[ûn]ü’s-sâbıkūn