Bab Mahkemesi 54 Numaralı Sicil (H. 1102 / M. 1691) cilt: 20, sayfa: 97 Hüküm no: 67 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. İbrahim’in Şaban Bey b. Murad’la nikahlanması Vilâyet-i Anadolu’da Amasya kazâsına tâbi‘ Şamir? nâm karye sâkinelerinden olup, hâlâ mahmiye-i İstanbul’da Haydarhâne Medresesi’nde müsâfireten sâkin olan Rahime bt. İbrahim nâm hâtun zât[ı] ma‘rifet-i şer‘î ile ârifân Veli Bey b. Receb ve İbrahim Bey b. Abdullah ta‘rîfleriyle mu‘arrefe olduklarından sonra meclis-i şer‘-i şerîf-i enverde, yine Amasya ahâlîsinden râfi‘ü hâze’l-kitâb Hüseyin Bey b. Murad b. Ali nâm kimesnenin kardeşi husûs-ı âti’z-zikre vekîl olduğu mezbûrân Veli Bey ve İbrahim Bey şehâdetleriyle şer‘an sâbit olan Şaban Bey b. Murad mahzarında ikrâr-ı tâm ve takrîr-i kelâm edip, bundan akdem zevcim olan Küçük Mehmed nâm kimesne bin doksan dokuz senesinde maktûlen fevt olup, târih-i mezbûrdan beri zevcim olmamağla, hâlâ nefsimi beş bin akçe mehr-i müeccel ile zeyl-i kitâbda muharrerü’l-esâmi müslimîn huzûrlarında mezbûr Şaban Bey’e inkâh ve tezvîc edip, ol dahi müvekkil-i mezbûr Hüseyin Bey için bi’l-vekâle tezevvüc ve kabûl eyledi dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel sene 1102. Şuhûdü’l-hâl: Veli Bey b. Rıza, İbrahim Bey b. Abdullah, İbrahim Çelebi b. Ahmed, Çavuşzâde Mehmed Çelebi ve gayruhüm.