Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 336 Hüküm no: 267 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Ali’nin vefat eden hanımı Emetullah Hatun’un terekesinden hakkını aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ el-Hâc İbrahim Efendi irsâl olunup ol dahi mahmiye-i İstanbul’da Edirnekapısı kurbünde Çakırağa mahâllesinde sâkine iken bundan akdem vefât eden Emetullah Hatun bt. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin zâhir[de] zevc-i metrûkü es-Seyyid Ömer b. Ali’den gayrı vâris-i ma‘rûfu olmayıp terekesinin nısfı zevci mezbûra ve nısf-ı âharı cânib-i beytülmala âid olmağla mahmiye-i mezbûrede bi’l-fi‘il beytülmal-ı hâss emîni fahrü’l-akrân es-Seyyid Mustafa Ağa b. el-Hâc Ahmed meclis-i ma‘kūd-ı mezbûrda bâ‘isü’l-kitâb mezbûr es-Seyyid Ömer mahzarında bi’l-emâne ikrâr ve takrîr-i kelâm edip müteveffât-ı mezbûrenin terekesi tahrîr ve ba‘de-ihrâci’l-masârıf bâkī kalan altmış guruşun nısfı otuz guruş cânib-i beytülmala âid olmağla mezbûr es-Seyyid Ömer meblağ-ı mezbûr otuz guruşu bana def‘ u teslîm, ben dahi tereke-i müteveffât-ı mezbûreden olmak üzere yedinden bi’t-tamâm ve’l-kemâl alıp kabz eyledim, min-ba‘d meblağ-ı mezbûr otuz guruşdan mezbûr es-Seyyid Ömer yedinde ve zimmetinde bir akçe ve bir habbe bâkī kalmayıp tereke-i müteveffât-ı mezbûreden makbûz ve masrûfuna ve mehr-i müecceline müte‘allıka aslâ ve kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan Hasan Çelebi b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min-Recebi’l-ferd sene 1143. Şuhûdü’l-hâl: İbrahim Efendi b. Hacı Mustafa İmam-ı mahâlle-i mezbûre, el-Hâc Mustafa Ağa b. Mehmed, Eyüb Çelebi b. Ahmed, Mustafa Reis b. Ahmed, Hüseyin Çelebi b. Süleyman