Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 337 Hüküm no: 268 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vefat eden kocası Ali Bey’in terekesinden hakkını aldığı Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i şerîf-i enverden mezûnen Mevlânâ el-Hâc İbrahim Efendi irsâl olunup ol dahi mahmiye-i İstanbul’da Küçük Ayasofya kurbünde Hüseyin Ağa mahâllesinde sâkin bundan akdem vefât eden Ali Bey b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zâhirde zevce-i menkûha-i metrûkesi Fâtıma Hatun bt. Ahmed’den gayrı vâris-i ma‘rûfu olmayıp terekesinin rub‘u zevcesi mezbûreye ve selâse-i erbâ‘ı cânib-i beytülmala âid oldukdan sonra zâtı ta‘rîf-i şer‘î ile mu‘arrefe olan bâ‘isetü’l-kitâb mezbûre Fâtıma Hatun meclis-i ma‘kūd-ı mezbûrda mahmiye-i mezbûrede bi’l-fi‘il beytülmalı’l-hâss emîni olup terekesinin selâse-i erbâ‘ına bi’l-emâne üzerine vaz‘-ı yed ve ber-vech-i âtî husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. el-Hâc Ahmed mahzarında da‘vâ ve takrîr-i kelâm edip zevcim müteveffâ-yı mezbûr Ali Bey b. Abdullah b. Abdullah zimmetinde işbu yedimde olan temessük mûcebince cihet-i karz-ı şer‘îden yüz guruş hakkım ile zevcim müteveffâ-yı mezbûr zimmetinde mütekarrer ve ma‘kūdün-aleyh on iki buçuk [guruş] mehr-i müeccel ki cem‘an yüz on iki buçuk guruş hakkım olup hattâ müteveffâ-yı mezbûr hâl-i kemâl-i sıhhatinde fevtinden beş sene mukaddem meblağayn-i mezbûreyn ciheteyn-i merkūmeteynden zimmetinde bana vâcibü’l-edâ deyni olduğu huzûr-ı Müslimînde ikrâr ve işhâd, kable’l-edâ fevt olmağla terekesinden taleb ederim, suâl olunsun dedikde gıbbe’s-suâl emîn-i mûmâ-ileyh cevâbında tereke-i müteveffâ-yı mezbûrun selâse-i erbâ‘ına bi’l-emâne vaz‘-ı yedini ikrâr ve müdde‘iye-i mezbûrenin ber-vech-i mübeyyen müdde‘âsını inkâr edicek, müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin es-Seyyid Halil Çelebi b. Veli ve mahmiye-i mezbûrede Nahılbend mahâllesinde sâkin Mustafa Bey b. Yusuf li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Ali Bey b. Abdullah b. Abdullah hâl-i kemâl-i sıhhatinde fevtinden beş sene mukaddem zevcesi işbu müdde‘iye-i mezbûre Fâtıma Hatun’a yedinde olan temessük mûcebince cihet-i karz-ı şer‘îden yüz guruş hakkı ile zevci müteveffâ-yı mezbûr zimmetinde mütekarrer ve ma‘kūdün-aleyh on iki buçuk guruş ki cem‘an yüz on iki buçuk guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an mürsel Hasan b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî-gurreti min-Receb sene 1143. Şuhûdü’l-hâl: Mustafa Efendi b. eş-Şeyh Abdüllatif, Ali Efendi b. İsmail, el-Hâc Ali b. Osman, İbrahim Efendi b. Mahmud, Abdullah Ağa b. Mehmed