Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 338 Hüküm no: 269 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin vefatında önce vasiyetini yerine getirmek üzere Abdullah Çelebi’yi vasi tayin ettiği Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden mezûnen Mevlânâ el-Hâc İbrahim Efendi irsâl olunup ol dahi mahmiye-i İstanbul’da Keçeci Piri mahâllesi ahâlîsinden iken bundan akdem vedâ‘-ı âlem-i fânî eden Ali Efendi b. Ramazan’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde merhûm-ı mezbûrun ber-vech-i âtî vasiyy-i muhtârı olduğunu iddi‘â eden bâ‘isü’l-kitâb Abdullah Çelebi b. Hüseyin meclis-i ma‘kūd-ı mezkûrda merhûm-ı mezbûrun zâhirde zevce-i menkûha-i metrûkesi Rukıye bt. İbrahim’den gayrı vâris-i ma‘rûfu olmayıp terekesinin rub‘u zevcesi mezbûreye ve selâse-i erbâ‘ı cânib-i beytülmala âid olmak üzere mahmiye-i mezbûrede bi’l-fi‘il beytülmalı’l-hâss emîni olup terekesinin selâse-i erbâ‘ına bi’l-emâne vaz‘-ı yed ve ber-vech-i âtî husûmet [60a] ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. el-Hâc Ahmed mahzarında üzerine da‘vâ ve takrîr-i kelâm edip merhûm-ı mezbûr Ali Efendi b. Ramazan b. el-Hâc Hamza hayâtında fevtinden on beş gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ oluna ve bâkī terekemden zevcem mezbûre rub‘ hissesini ahz u kabz ettikden sonra selâse-i erbâ‘ını benim için vasiyy-i muhtârım ve li-ebeveyn kız karındaşım oğlu hasran vârisimdir ahz u kabz eyleye deyü vasiyet edip tenfîzine beni huzûr-ı Müslimînde vasiyy-i muhtâr nasb u ta‘yîn edip ben dahi muvâcehesinde ba‘de’l-kabûl musırran-aleyhâ merhûm olmağla ber-vech-i muharrer tenfîz-i vesâyâ murâd eylediğimde emîn-i mûmâ-ileyh mâni‘ olur, suâl olunsun dedikde gıbbe’s-suâl emîn-i mûmâ-ileyh cevâbında tereke-i merhûm-ı mezbûra bi’l-emâne vaz‘-ı yedini ikrâr ve müdde‘î-i mezbûrun ber-vech-i mu‘ayyen müdde‘âsını inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre sükkânından es-Seyyid İbrahim Ağa b. Mehmed ve Mehmed Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr Ali Efendi b. Ramazan b. Hacı Hamza hayâtında fevtinden on beş gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ oluna ve bâkī terekemden zevcem mezbûre Rukıye Hatun rub‘ hissesini ahz u kabz ettikden sonra selâse-i erbâ‘ını vasiyy-i muhtârım işbu müdde‘î-i mezbûr Abdullah Çelebi li-ebeveyn kız karındaşım oğlu ve hasran vârisimdir ahz u kabz eyleye deyü vasiyet edip tenfîzine işbu müdde‘î-i mezbûr Abdullah Çelebi’yi huzûrumuzda vasiyy-i muhtâr nasb u ta‘yîn edip ol dahi muvâcehesinde ba‘de’l-kabûl musırran-aleyhâ vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Hasan b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-âşir min-Recebi’l-ferd sene 1143. Şuhûdü’l-hâl: Fahrü’l-kuzât Receb Efendi, es-Seyyid Ahmed Efendi b. Mehmed, Mustafa Beşe b. Osman, Ali Çelebi b. Abdullah, Salih Çelebi b. Halil