Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 339 Hüküm no: 270 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Garabet’in vefat eden Mehmed Efendi’de alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ Sadi Ali Efendi irsâl olunup ol dahi mahmiye-i İstanbul’da Saray-ı atik kurbünde Mercan Ağa mahâllesinde umdetü’l-a‘yân el-Hâc Mehmed Ağa b. Musa Ağa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde kasab tâifesinden işbu bâ‘isü’s-sifr Garabet v. Sevi nâm zimmî meclis-i ma‘kūd-ı mezkûrda mahmiye-i mezbûrede Kabasakal mahâllesinde sâkin iken bundan akdem vefât eden başmuhâsebeci Bosnavî el-Hâc Mehmed Efendi b. Zülfikar’ın zevce-i menkûha-i metrûkesi ve sulbî sagīr oğlu Salih Ağa’nın tesviye-i umûruna bâ-hüccet-i şer‘iyye vasiyy-i muhtâresi olmağla terekesine bi’l-vesâye ve bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Saraylı Bahtiyar Hatun bt. ( ) mahzarında üzerine da‘vâ ve takrîr-i kelâm edip merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde yedinden müşterâ ve makbûz lahm bahasından ba‘de-külli’l-hesâb yüz üç guruş hakkım hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt, terekesinden taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Kâtib Mustafa Efendi b. el-Hâc Mehmed ve Ahmed Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mesfûr kasab Garabet zimmîye yedinden müşterâ ve makbûz lahm-ı ganem bahasından ba‘de-külli’l-hesâb yüz üç guruş zimmetinde vâcibü’l-edâ deyni olduğunu huzûrumuzda ikrâr ve biz[i] işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ali Çelebi b. İbrahim ve Hasan Çelebi b. Mustafa ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 12 min-Recebi’l-ferd sene 1143. Şuhûdü’l-hâl: el-Hâc Mehmed b. İbrahim Şerbetçi, el-Hâc Halil b. Mustafa Bakkāl, el-Hâc Mehmed Ağa b. Musa Dâmâd, Ahmed Çelebi b. İbrahim, el-Hâc Mehmed Ağa b. Ali, İbrahim Çelebi b. Ali, Ali Çelebi b. İbrahim