Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 340 Hüküm no: 271 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf Osman Çelebi’nin vefat eden Mehmed Efendi’de alacağı olduğu Kezâlik akd-i meclis-i şer‘-i şerîf ettikde haffâf tâifesinden işbu bâ‘isü’l-kitâb Osman Çelebi b. Ali meclis-i ma‘kūd-ı mezkûrda mahmiye-i mezbûrede Kabasakal mahâllesinde sâkin iken bundan akdem vefât eden başmuhâsebeci Bosnavî el-Hâc Mehmed Efendi b. Zülfikar’ın zevce-i menkûha-i metrûkesi ve sulbî sagīr oğlu Salih Ağa’nın tesviye-i umûruna bâ-hüccet-i şer‘iyye vasiyy-i muhtâresi olmağla bi’l-vesâye ve bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Saraylı Bahtiyar Hatun bt. Abdullah mahzarında üzerine da‘vâ ve takrîr-i kelâm edip merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde işbu yedimde olan memhûr tezkireler mûcebince yedimden müşterâ ve makbûz mest papuç ve çizme bahalarından ba‘de-külli’l-hesâb yüz yirmi beş guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i mezkûreden zimmetinde bana vâcibü’l-edâ deyni olduğununu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Kâtib Mustafa Efendi b. el-Hâc Mehmed ve İbrahim Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i merkūm Haffâf Osman Çelebi’ye yedinde olan memhûr tezkireler mûcebince yedinden müşterâ ve makbûz mest papuç ve çizme bahalarından ba‘de-külli’l-hesâb yüz yirmi beş guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, ilâ-âhırihî gıbbe’t-tahlîfi’ş-şer‘î mûcebiyle ba‘de’l-hükm mürsel mezbûrân. Li-seneti’l-merkūme fi’t-târîhi’l-mezbû[r]. Eş-Şâhidûnü’s-sâbıkūn