Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 341 Hüküm no: 272 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toma v. Avanos’un vefat eden Mehmed Efendi’de alacağı olduğu Kezâlik akd-i meclis-i şer‘-i şerîf ettikde Acem tâifesinden işbu bâ‘isü’s-sifr Toma v. Avanos nâm zimmî meclis-i ma‘kūd-ı mezkûrda mahmiye-i mezbûrede Kabasakal mahâllesinde sâkin iken bundan akdem vefât eden başmuhâsebeci Bosnavî el-Hâc Mehmed Efendi b. Zülfikar’ın zevce-i menkûha-i metrûkesi ve sulbî sagīr oğlu Salih Ağa’nın tesviye-i umûruna bâ-hüccet-i şer‘iyye vasiyye-i muhtâresi olmağla terekesine bi’l-vesâye ve bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Saraylı Bahtiyar Hatun bt. Abdullah mahzarında üzerine da‘vâ ve takrîr-i kelâm edip merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde işbu yedimde olan memhûr tezkireler mûcebince yedimden müşterâ ve makbûz alaca ve şal ve bogasi ve dülbend ve yemenî bahalarından ba‘de-külli’l-hesâb yirmi sekiz bin dört yüz seksen iki akçe hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Kâtib Mustafa Efendi b. el-Hâc Mehmed ve İbrahim Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mezbûr Acem Toma zimmîye yedinde olan memhûr tezkireler mûcebince yedinden müşterâ ve makbûz alaca şal ve bogasi ve dülbend ve yemenî bahalarından ba‘de-külli’l-hesâb yirmi sekiz bin dört yüz seksen iki akçe zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi ilâ-ahirihî mürsel mezbûrân. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn