Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 342 Hüküm no: 273 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger Ayan’ın vefat eden Mehmed Efendi’de alacağı olduğu Kezâlik akd-i meclis-i şer‘-i şerîf ettikde dülger tâifesinden işbu bâ‘isü’s-sifr Ayan v. Yani nâm zimmî meclis-i ma‘kūd-ı mezkûrda mahmiye-i mezbûrede Kabasakal mahâllesinde sâkin iken bundan akdem vefât eden başmuhâsebeci Bosnavî el-Hâc Mehmed Efendi b. Zülfikar’ın zevce-i menkûha-i metrûkesi ve sulbî sagīr oğlu Salih Ağa’nın tesviye-i umûruna bâ-hüccet-i şer‘iyye vasiyye-i muhtâresi olmağla terekesine bi’l-vesâye ve bi’l-verâse vâzı‘atü’l-yed olan zâtı ta‘rîf-i şer‘î ile mu‘arrefe olan Saraylı Bahtiyar Hatun bt. Abdullah mahzarında üzerine da‘vâ ve takrîr-i kelâm edip merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde yedimden müşterâ ve makbûz kereste bahasından ve neccârlık ücretinden ba‘de-külli’l-hesâb üç yüz elli iki guruş bir rub‘ hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Kâtib Mustafa Efendi b. el-Hâc Mehmed ve Ahmed Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mezbûr Dülger Ayan zimmîye yedinden müşterâ ve makbûz kereste bahasından ba‘de-külli’l-hesâb [61a] üç yüz elli iki guruş bir rub‘ zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi ilâ-âhırihî. Fi’t-târîhi’l-mezbûr li-seneti’l-merkūme mürsel mezbûrân. Eş-şâhidûnü’s-sâbıkūn