Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 342 Hüküm no: 274 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Mehmed Ağa’nın vefat eden Başmuhasebeci Mehmed Efendi’de alacağı olduğu Kezâlik akd-i meclis-i şer‘-i şerîf ettikde şerbetçi tâifesinden işbu bâ‘isü’l-kitâb el-Hâc Mehmed Ağa b. İbrahim meclis-i ma‘kūd-ı mezbûrda mahmiye-i merkūmede Kabasakal mahâllesinde sâkin iken bundan akdem vefât eden başmuhâsebeci Bosnavî Mehmed Efendi b. Zülfikar’ın zevce-i menkûha-i metrûkesi ve sulbî sagīr oğlu Salih Ağa’nın tesviye-i umûruna bâ-hüccet-i şer‘iyye vasiyye-i muhtâresi olmağla terekesine bi’l-verâse ve bi’l-vesâye vâzı‘ü’l-yed olup zâtı ta‘rîf-i şer‘î ile mu‘arrefe olan Saraylı Bahtiyar Hatun bt. Abdullah mahzarında üzerine da‘vâ ve takrîr-i kelâm edip merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde işbu tezkire mûcebince yedimden müşterâ ve makbûz gülbeşeker ve şerbet bahalarından ba‘de-külli’l-hesâb on beş bin yedi yüz on dokuz akçe hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Hocapaşa mahâllesinde sâkin el-Hâc Abdullah b. İbrahim ve Bakkāl el-Hâc Halil b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr muhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mezbûr Şerbetçi el-Hâc Mehmed Ağa’ya tezkire mûcebince yedinden müşterâ ve makbûz gülbeşeker ve şerbet bahalarından ba‘de-külli’l-hesâb on beş bin yedi yüz on dokuz akçe zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mezbûr Şerbetçi el-Hâc Mehmed Ağa yine meclis-i mezbûrda vasiyye-i merkūme mahzarında üzerine da‘vâ ve takrîr-i kelâm edip merhûm-ı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde yedimden müşterâ ve makbûz kebât ve şerbet bahasından ba‘de-külli’l-hesâb iki bin yüz akçe dahi hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Mustafa Efendi b. Mehmed ve Ahmed Çelebi b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr başmuhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mezbûr Şerbetçi Mehmed Ağa’ya yedinden müşterâ ve makbûz kebât ve şerbet bahasından ba‘de-külli’l-hesâb iki bin yüz akçe zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm. Fi’t-târîhi’l-mezbûr li-seneti’l-merkūme. Eş-Şâhidûnü’s-sâbıkūn