Bab Mahkemesi 54 Numaralı Sicil (H. 1102 / M. 1691) cilt: 20, sayfa: 97 Hüküm no: 68 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiragos v. Kirkor’un topladığı vergilerden zimmetinin ibrası Vilâyet-i Anadolu’da Kayseriye kazâsına tâbi‘ Tibze? nâm karye re‘âyâlarının kethüdâları ve taraflarından vekîlleri olup, mahmiye-i İstanbul’da Parmakkapısı’nda müsâfiren sâkin Bogos v. Haçok nâm zimmî meclis-i şer‘-i şerîf-i enver ve mahfil-i dîn-i münîf-i ezherde, işbu bâ‘isü’s-sifr Kiragos v. Kirkor muvâcehesinde ikrâr ve takrîr-i kelâm edip, târih-i kitâbdan yedi sene mukaddem karye-i mezbûrda kethüdâ ve vekîlleri olup avârız-ı dîvâniye ve tekâlîf-i örfiyye cem‘ine me’mûr olmağla mezbûr Kiragos’un doksan altı ve doksan yedi senelerinin bâ-fermân-ı âlî üzerine edâsı lâzım gelen on beş guruş tekâlîf hissesi mezbûrun yedinde kalmakla, mezbûrdan üç guruşunu târih-i mezbûrda zevcesi Kemhi? bt. Sohana nâm zimmîden ahz edip, meblağ-ı bâkī on iki guruş mezbûr Kiragos’un kalmışdı. Hâlâ meblağ-ı mezbûr on iki guruşu dahi mezbûr Kiragos bi’t-tamâm bana def‘ ve teslîm, ben dahi bi’l-vekâle yedinden ahz u kabz eyledim. Ba‘de’l-yevm sinîn-i mezkûrda zikr olunan tekâlîf-i örfiyyeden mezbûr Kiragos’un zimmetinde bir akçe ve bir habbe kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Cemâziyelevvel sene 1102. Şuhûdü’l-hâl: Ahmed Çelebi b. Ahmed, Mahmud b. Hasan, Ahmed b. Ahmed, Ebûbekir b. Hüseyin, Kirmer v. Sefaz, Nursez v. Sahak, Adleruşiyeyin? Panayot v. Dimitri.