Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 345 Hüküm no: 276 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin vefatı üzerine küçük oğlu için hizmetçi cariye alınmasına izin verildiği Mahmiye-i İstanbul’da Dâye Hatun mahâllesinde sâkin iken bundan akdem vefât eden Fincânî Ahmed Çelebi b. el-Hâc Yusuf’un sulbî sagīr oğlu Ahmed’in vâlidesi ve tesviye-i umûruna bâ-hüccet-i şer‘iyye vasiyye-i muhtâresi bâ‘isetü’l-kitâb Emine Hatun bt. el-Hâc Süleyman meclis-i şer‘-i şerîf-i enverde bi’l-vesâye takrîr-i kelâm ve ta‘bîr ani’l-merâm edip vasîsi olduğum sagīr-i mezbûrun hâdimeye eşedd-i ihtiyâç ile muhtâc olup sagīr-i mezbûrun mâlının dahi müsâ‘adesi olmağla mâl-ı müntakilinden sagīr-i mezbûr için yüz elli guruşa kadar bir hâdime câriye iştirâsına kıbel-i şer‘den mezûne olmak bi’l-vesâye matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûra mâl-ı müntakilinden yüz elli guruşa değin bir câriye iştirâsına vasiyye-i mezbûre Emine Hatun’a izin birle mâ vaka‘a bi’t-taleb ketb olundu. Fî 7 min-Recebi’l-ferd sene [11]43. Şuhûdü’l-hâl: Mehmed Çelebi b. Mehmed, el-Hâc İbrahim b. Abdullah, Ahmed Çelebi b. İbrahim, Hasan Çelebi b. Osman, Salih Çelebi b. Halil, Ahmed Çelebi b. Hasan, İbrahim Çelebi b. İbrahim