Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 346 Hüküm no: 277 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed ve hizmetçi cariyesine nafaka takdiri Mahmiye-i İstanbul’da Dâye Hatun mahâllesinde sâkin iken bundan akdem vefât eden Fincânî Ahmed Çelebi b. el-Hâc Yusuf’un sulbî sagīr oğlu Ahmed’in vâlidesi ve tesviye-i umûruna vasiyye-i muhtâresi işbu bâ‘isetü’l-kitâb Emine Hatun bt. el-Hâc Süleyman talebiyle hâkim-i muvakkı‘-ı sadr-ı kitâb bi-tevkīfihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûr ile hâdimesinin nafaka ve kisveleri için mâl-ı müntakilinden yevmî onar para nafaka ve kisve-baha farz ve takdîr buyurup meblağ-ı mefrûz-ı mezbûr yevmî onar parayı sagīr-i mezbûr ile hâdimesinin nafaka ve kisve ve sâir levâzım-ı zarûriyesine harc u sarfa ve lede’l-hâce istidâneye ve inde’z-zafer sagīr-i mezbûrun mâlına rücû‘a vasiyye-i mezbûre Emine Hatun’a izin birle mâ vaka‘a bi’t-taleb ketb olundu. Fî 20 min-Cemâziyelâhire sene [1]143. Eş-şâhidûnü’s-sâbıkūn