Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 346 Hüküm no: 278 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’e kalan harap evdeki hissesinin satılmasına izin verildiği Mahmiye-i İstanbul’da Dâye Hatun mahâllesinde sâkin iken bundan akdem vefât eden Fincânî Ahmed Çelebi b. el-Hâc Yusuf’un sulbî sagīr oğlu Ahmed’in vâlidesi ve tesviye-i umûruna bâ-hüccet-i şer‘iyye vasiyye-i muhtâresi olup zâtı ta‘rîf-i şer‘î ile mu‘arrefe olan bâ‘isetü’l-kitâb Emine Hatun bt. el-Hâc Süleyman meclis-i şer‘de bi’l-vesâye takrîr-i kelâm edip merhûm Mısrîzâde el-Hâc Hüseyin Kapudan Vakfı’ndan olup mahrûse-i Galata’da Hüseyin Ağa mahâllesinde vâki‘ iki tarafdan Saliha Hatun mülkü ve bir tarafı Karabet zimmî mülkü ve bir tarafı tarîk-i âm ile mahdûd tabaka-i ulyâda beş bâb oda ve bir matbâh ve bir kilâr ve dehliz ve kenîf ve tabaka-i vustâda bir bâb oda ve tahtında iki mahzen ve bir bâb dükkân ve bi’r-i mâ ve kenîf ve havluyu ve bağçeyi müştemil vakıf menzilin üç hissesi âharın tasarrufunda olmağla ve bir hissesi müteveffâ-yı mezbûrun ile’l-vefât taht-ı tasarrufunda olup ba‘de-vefâtihî oğlu sagīr-i mezbûra intikāl-i âdî ile intikāl edip lâkin menzil-i mezbûr ânen fe-ânen harâba müşrif ve hâsılı harcına vefâ etmeyip ve menzil-i mezbûrun rub‘ hissesi kendüye nef‘ verir vech üzere imrâr mümkin olmayıp bekāsı sagīr-i mezbûra muzır olmağın menzil-i mezbûrda olan sagīr-i mezbûrun rub‘ hissesi ba‘de’l-müzâyede ve inkıtâ‘i’r-rağbe bedel-i misli ve ma‘rifet-i mütevellî ile âhara ferâğ olunup bedel-i ferâğ istirbâh ve istiğlâl olunmak sagīr-i mezbûr hakkında nef‘-i mahz olmağın menzil-i mezbûrda olan sagīr-i mezbûrun rub‘ hissesi ber-vech-i muharrer âhara ferâğa cânib-i şer‘den mezûne olmak matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb bi-tevkīfihi’r-refî‘i’l-müstetâb tûbâ-lehû ve hüsnü-meâb efendi hazretleri menzil-i mahdûd-ı mezbûrda olan sagīr-i mezbûrun rub‘ hissesi bi’l-müzâyede ve inkıtâ‘i’r-rağbe bedel-i misli ve ma‘rifet-i mütevellî ile âhara ferâğa vasiyye-i mezbûre Emine Hatun’a izin birle mâ vaka‘a bi’t-taleb ketb olundu. Fî 7 min-Recebi’l-ferd sene [1]143. Eş-şâhidûnü’s-sâbıkūn