Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 347 Hüküm no: 279 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın vefat eden İshak Ağa’da alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden fahrü’l-müderrisîni’l-kirâm Mevlânâ Mektûbî Mehmed Emin Efendi irsâl olunup ol dahi mahmiye-i İstanbul’da Kumkapı kurbünde Nişâncıpaşa-yı Atik mahâllesi ahâlîsinden olup bundan akdem vefât eden Dergâh-ı âlî kapıcıbaşılarından İshak Ağa b. Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede İnebey mahâllesinde sâkin bâ‘isü’l-kitâb Ahmed Ağa b. el-Hâc Derviş meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve sulbî sagīr oğlu Abdülkadir ve sulbiye sagīre kızı Saliha’nın vâlidesi ve tesviye-i emrlerine vasiyye-i mansûbeleri olmağla tereke-i müteveffâ-yı mezbûra bi’l-verâse ve bi’l-vesâye vaz‘-ı yed eden Âişe Hatun bt. Mehmed tarafından husûs-ı âti’l-beyanda vekîl-i müsecceli Ahmed Ağa b. Mahmud ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah mahzarında üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak zimmetinde cihet-i karz-ı şer‘îden yüz kırk guruş hakkım olup ve beynimizde ma‘lûm cihet-i deyn-i şer‘îden dahi yüz yirmi beş guruş cem‘an iki yüz altmış beş guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mecmû‘-ı mezbûr ciheteyn-i mezkûreteynden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Nahılbend mahâllesinde sâkin Hâfız el-Hâc İbrahim Efendi b. Hasan ve müteveffâ-yı mezbûrun etbâ‘ından Mustafa Çelebi b. Ahmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr İshak Ağa b. Ali b. İshak hâl-i kemâl-i sıhhatinde işbu müdde‘î-i mezbûr Ahmed Ağa’ya cihet-i karz-ı şer‘îden ve beynlerinde ma‘lûm cihet-i deyn-i şer‘îden dahi yüz yirmi beş guruş ki cem‘an ciheteyn-i mezkûreteynden iki yüz altmış beş guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Ahmed Çelebi b. İsmail ve Hüseyin Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 8 min-Recebi’l-ferd sene 1143. Şuhûdü’l-hâl: Süleyman Efendi b. Mehmed, Mustafa Efendi b. Ahmed, Ali Çavuş b. Mehmed, İbrahim Çelebi b. Abdullah, Mehmed Çelebi b. İbrahim, Abdurrahim Çelebi b. Mehmed, Salih Çelebi b. İbrahim, Hüseyin Çelebi b. Mehmed, Ahmed Çelebi b. İsmail ve gayruhum